Mga duwa karon: 5:00 pm- TNT batok Rain or Shine 7:30 pm- San Miguel batok Ginebra
Mosuway pagsulod sa finals ang Grandslam seeking TNT Tropang 5G sa ilang pagpakigbatok og balik sa Rain or Shine Elasto Painters sa premirong duwa karong Biyernes, Hulyo 4, 2025, sa Game 5 sa semi-finals series sa Philippine Basketball Association (PBA) Season 49 Philippine Cup sa Smart Araneta Coliseum.
Bisan nabalian sila og mga haligi, ang Tropa nakamaneho gihapon pagmakmak sa Elasto Painters, 108-92, sa Game 4 niadtong Miyerkules sa gabii aron pagposte og dominanteng 3-1 nga bintaha sa best-of-seven series.
Ning sangkaa, wala gihapon nakaduwa ang Sugboanong pambato sa Tropa nga si Roger Pogoy gumikan kay nagpaalim pa kini sa angol (hamstring) nga iyang nasinati sa Game 2.
Gawas niini, nakasinati sab og angol ning sangkaa ang laing mga pambato sa Tropa nga sila si Calvin Oftana (sprained left ankle) ug Kelly Williams (sprained right ankle).
Ang nangahisgutang mga magduduwa pulos kuwestiyunableng makaduwa ning higayuna ug mao kini ang nakahatag og kabalaka ni TNT coach Chot Reyes.
“I’m only concerned if we have enough men because we’re just falling like flies. We lost Kelly, Calvin as well,” matod ni Reyes nga napatik sa www.pba.ph.
Ang Tropa ningkombati nang daan nga wala sila si Jayson Castro ug Rey Nambatac sa wala pa nagsugod ang series.
Hinuon basi sa ilang gipakitang duwa sa Game 4, napamatud-an sa Tropa nga aduna pa gihapon sila’y saktong ikabuga taliwala sa ilang sitwasyon.
Gipakita sa nahabiling mga magduduwa sa Tropa, hilabi na sila si Jordan Heading, Brandon Ganuelas-Rosser, ug Glenn Khobuntin, nga andam sila nga mopas-an og bug-at nga obligasyon.
Sa ilang bahin, ang Elasto Painters ni coach Yeng Guiao seguradong dili bastabasta moisa sa ilang puting bandera ug mokombati kini’g insakto hangtod nga aduna pa sila’y kinabuhi.
Sa laing bahin, buakon sa San Miguel Beermen ug Brgy. Ginebra Gin Kings ang 2-2 nga panagtabla sa ilang panagsangka og balik sa Game 5 sa laing semi-finals series.
Gipanghubog og maayo sa Beermen ang Gin Kings, 107-82, sa Game 4 niadtong Miyerkules aron tablahon ang series. / ESL