Mga duwa karon:
5:00 pm- Ginebra batok San Miguel
7:30 pm- TNT batok Rain or Shine
Parehong mosuway pagposte og 3-1 nga bintaha ang Grandslam seeking TNT Tropang 5G ug Brgy. Ginebra Gin Kings sa ilang pagpakigbatok og lainlaing kontra karong Miyerkules, Hulyo 2, 2025, sa Game 4 sa Philippine Basketball Association (PBA) Season 49 Philippine Cup semi-finals series sa SM Mall of Asia Arena sa Pasay City.
Ang Tropang 5G makigharong sa Rain or Shine Elasto Painters sa main game human sa engkuwentro sa Gin Kings ug San Miguel Beermen sa premirong duwa sugod sa alas 5:00 sa hapon.
Ang Tropang 5G ningdaog sa nag-unang duha ka mga duwa sa series apan bangis silang gibawsan sa Elasto Painters sa Game 3, 107-86, niadtong Dominggo, Hunyo 29.
Ning maong duwaa, wala nakapakita og aksyon ang Sugboanong pambato sa Tropang 5G nga si Roger Pogoy gumikan sa angol niini (hamstring), nga iyang nasinati sa Game 2.
Ning sangkaa, kuwestiyunable gihapon nga makaduwa si Pogoy alang sa Tropang 5G ug kon makaduwa man si Pogoy, gituohang dili sab 100% ang kondisyon niini.
Naa o wala si Pogoy, ang Elasto Painters nasayod nang daan sa angayan nilang pagabuhaton.
“Our best chance is to make this series long. If it becomes a short series talo kami,” matod ni Rain or Shine coach Yeng Guiao nga napatik sa www.pba.ph.
“We know our best chance is really taking this series to the stretch.”
Sa laing panagparang, nabawi sa Gin Kings ang momentum sa series human nila gipanghubog ang Beermen, 100-90, sa Game 3 nga naghatag kanila og 2-1 nga bintaha sa series.
Sa Game 3, dili ra 100% ang kondisyon sa Sugboanong higante sa Beermen nga si June Mar Fajardo ug limitado lang ang oras niini tungod sa nasinati niining calf injury.
“Bawi next time, mahaba pa ang series,” matod pa sa 8-time MVP nga si Fajardo human sa ilang kapildihan sa Game 3.
Ang duha ka mga adlaw nga pahuway igo na aron mahibalik sa saktong kondisyon si Fajardo ug seguradong gipangandaman kini sa Gin Kings. / ESL