Truck ban sa Sinulog sa Carmen ipatuman

ROAD CLOSURE: Sirhan gikan sa tanang mga sakyanan ang karsada nga agian sa grand parade sa Sinulog sa Carmen sa alas 11 sa buntag hangtod sa alas 11 sa gabii. Lahi sab ang truck ban nga magsugod sa tungang gabii sa Dominggo hangtod sa tungang gabii sa Lunes. / CARMEN CEBU TOURISM OFFICE FB PAGE
ROAD CLOSURE: Sirhan gikan sa tanang mga sakyanan ang karsada nga agian sa grand parade sa Sinulog sa Carmen sa alas 11 sa buntag hangtod sa alas 11 sa gabii. Lahi sab ang truck ban nga magsugod sa tungang gabii sa Dominggo hangtod sa tungang gabii sa Lunes. / CARMEN CEBU TOURISM OFFICE FB PAGEHOPKINS COWAN

Gimando ni Cebu Governor Gwendolyn Garcia ang pagpatuman sa truck ban sa lungsod sa Carmen subay sa pagsaulog niini sa ika-51 nga katuigan sa Sinulog karong Dominggo, Enero 28, 2024.

Subay sa giluwatang memorandum ni Garcia, gidili ang pag-agi sa mga six-wheeler truck ug kadtong mga sakyanan nga mosobra pa ang kapasidad.

Gipahibalo nga ang truck ban sugdan sa boundary sa dakbayan sa Danao ug lungsod sa Carmen ug utlanan sa Carmen ug Catmon gikan sa alas 12:01 sa tungang gabii sa Enero 28 hangtod sa alas 12:01 sa tungang gabii sa Enero 29, Lunes.

Subay niini, gimandoan ang kapulisan nga mopatuman sa mando.

Ang Sinulog sa Carmen maglangkob sa parade ug street dancing competition dayon ang Grand Ritual showdown nga ipahigayon sa gabii.

Hinungdan sa pagsirado usab sa nasudnong kadalanan niini sugod alas 11 sa buntag hangtod na sa alas 11 sa gabii alang sa tanang mga sakyanan.

Gilauman ang pagsalmot sa pito ka mga grupo sa barangay sa lungsod alang sa Local category nga apilan sa Tribu Reglas; Tribu San Roque, Tribu Bagho Cultural Troupe, Tribu Luyangnon, Pundok sa Nagkahiusang Cortehanon, Tribu Ipilacion ug Tribu Panaghiusa.

Samtang giatangan usab sa mga bisita ang open category alang sa mga grupo gikan sa laing lokalidad sama sa Tribu Mabolokon, Tribu Masadyaong Subanian, Banauan Cultural Group, Tribu Aktibong Binaliwhanon, Tribu Banay San Nicolasnon, Banay Labangon, Lumad Basakanon nga pulos gikan sa dakbayan sa Sugbo, lakip na ang contingent gikan sa lalawigan sa Sugbo nga Carcar City.

Sama sa miaging tuig, hugot nga seguridad usab ang ipatuman sa Police Regional Office (PRO 7) sugod karong adlawa, Enero 27 tungod sa gipaabot nga pagdagsang sa mga bisita sa lungsod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph