Nakabsan gyud sa kinabuhi kadtong truck helper nga nadat-ugan sa natagak nga backhoe alas 3:45 sa buntag, Biyernes, Hulyo 25, 2025 sa Sityo Baksan, Barangay Sapangdaku, Dakbayan sa Sugbo.
Ang biktima nga patay nang nadangat sa Vicento Sotto Memorial Medical Center giila nga si Mark Vincent Latayad, residente sa Dakbayan sa Naga.
Naluwas hinuon ang iyang mga kauban nga pahinante nga silang Kiven Navales, taga Siyudad sa Naga, ug Glenn Formentera, taga Consolacion.
Sa imbestigasyon sa Traffic Enforcement Unit sa Cebu City Police Office nga nagkarga og backhoe ang Isuzu 10-wheeler truck nga gipanag- iya sa Quirante Construction Corporation nga gimaneho ni Gilberto Flores, 45, taga Basak, San Fernando aron ihatod sa Barangay Pamutan, bukirang dapit sa Dakbayan sa Sugbo.
Matod sa driver nga gihigot nila pag-ayo ang backhoe gamit ang kadena aron di matagak apan pag-abot sa Sityo Baksan, usa sa mga kadena nga gihigot ang nabugto nga wala nila damha nga mahitabo.
Tungod sa pagkabugto sa kadena nga gihigot, nitakilid ang backhoe ug nahagbong gyud kini sa kilid sa karsada gikan 10-wheeler truck.
Sa dihang nabuwag ang backhoe nitakilid usab ang truck nga maoy hinungdan nga ang tulo ka pahente nangambak sa sakyanan aron maluwas.
Apan si Latayad nga niambak sa walang bahin sa karsada maoy nadat-ogan sa natagak nga backhoe hinungdan sa iyang pagkapiit.
Dali siya nga gidala sa tambalanan apan gideklarar nga dead on arrival sa mga doctor samtang ang driver sa truck nga si Flores kasamtangan nga gikustodiya sa TEU ug mag-atubang og kasong Reckless Imprudence Resulting in Homicide.
Ang driver ug ang mga pahenante pulos kini trabahante sa Quirante Construction Corporation.