Usa ka 72-anyos nga lola ang namatay human aksidenteng naligsan sa usa ka truck nga nag-andar kansang kambyada natandog matod pa sa usa ka truck boy sa may dalan Plaridel, Carbon, Barangay Ermita, Dakbayan sa Sugbo, alas 3:10 sa hapon, Huwebes, Agusto 6, 2026.
Ang biktima giila nga si Emma Erbito, 72, taga Barangay Canlumampao, Dakbayan sa Toledo. Samtang ang truck boy nga nakatandog sa kambyada giila nga si Van Lee Amandoron, 25, helper ug residente sa Sityo Tunga, Barangay Montañeza, Lungsod sa Malabuyoc.
Subay sa imbestigasyon sa Traffic Enforcement Unit (TEU) sa Cebu City Police Office (CCPO), naka-parking apan nag-andar ang makina sa usa ka Isuzu Forward truck (WAD 390) sa kilid sa karsada samtang nagdiskarga sa mga utanon gikan sa probinsiya.
Sumala sa kapulisan, nisaka si Amandoron sa sakyanan agi sa driver’s side aron motabok sa passenger seat.
Apan sa iyang paglakang, natandog ug natarog niya ang kambyada nga maoy hinungdan sa kalit nga pag-abante sa truck.
Naatol sab nga naglakaw sa atubangan sa sakyanan ang biktima ug nadasmagan.
Tungod sa kakusog sa impact, nalamba ang lola ug nakaangkon og grabeng kadaot sa iyang ulo ug lawas.
Daling gidala ang biktima sa Cebu City Medical Center (CCMC) apan gideklarar siya sa mga doktor nga dead on arrival.
Kasamtangang gitanggong sa TEU ang maong truck boy ug giandaman na og kasong Reckless Imprudence Resulting in Homicide.
Nibutyag si Police Lieutenant Colonel Jomar Medil, hepe sa TEU-CCPO, nga kon naka-handbrake pa lang unta ang maong sakyanan, dili unta kini makakalas og kinabuhi. / AYB
