Usa ka trailer truck ang kalit nisilaob samtang nagdagan sa Cebu South Coastal Road (CSCR) sa Brgy. San Roque, dakbayan sa Talisay, alas 10:48 sa buntag, Dominggo, Agusto 4, 2024.
Ang trailer nagkarga og dakong container van, nakabalda ug nakaali sa trapiko tungod sa pagtubag sa mga bombero sa alarma sa sunog.
Sa follow up sa Superbalita Cebu sa Bureau of Fire Protection (BFP) sa Talisay, Sugbo nasayran nga pinaagi ni fire investigator F01 Jerome Dalaota nga ang maong trailer truck gikan sa Pier 4 nga nitadlas sa maong dapit nga gimaniho ni Clarense Litang, 42, minyo ug taga Brgy. Pasil, Siyudad sa Sugbo.
Matod pa nga kalit nag-spark ang wirings sa trailer truck ug niaso ug dayon niulbo ang kayo. Way kinabuhi nga naapektohan apan naapil og kasunog ang dakong container van.
Sumala sa mga bombero, ang sunog nagbilin og dayon nga P50,000.
Atol ning pagsuwat, nagpadayon pa ang imbestigasyon sa mga bombero ug wa pa gibutyag kon unsay sud sa container van. / DVG