NAHABWA ang mga kahoy human nalimbuwad ang truck nga gikargahan niini pasado alas 10 sa buntag, Lunes, Hulyo 7, 2025, sa may S. Osmeña Street corner V. Sotto Street, Barangay Tinago, Dakbayan sa Sugbo.
Nailhan ang drayber nga si Rene Labitad, 50 anyos nga taga Dakbayan sa Naga.
Usa ka concerned citizen ang nipahibalo sa Traffic Enforcement Unit kon TEU mahitungod sa maong insidente nga nakamugna og trapiko sa dapit hinungdan nga ila dayon kining girespondehan.
Sigon ni Labitad, gikan siya sa Pier 2 nagkarga sa mga kahoy para unta ihatod sa ilang warehouse sa Lungsod sa Minglanilla apan pag-abot sa maong crossing, natumba kini sa iyang pagliko tungod nawagtangan siya og kontrol.
Giingong wala mabalanse ang pagkahimutang sa mga kahoy nga gihigtan lang og alambre.
Hinuon luwas ra ang drayber ug ang iyang helper.
Atol niining pagsuwat, gidala na sa TEU ang maong sakyanan alang sa dugang imbestigasyon. / JDG