NIPADAYAG og suporta si US President Donald Trump niadtong Martes, Hulyo 23, 2025, sa independenteng foreign policy ni Presidente Ferdinand “Bongbong” Marcos Jr., nga nag-ingon nga ang Pilipinas kinahanglang mobuhat sa unsay labing maayo alang sa iyang katawhan.
Sa usa ka hiniusang press conference sa White House niadtong Martes, Hulyo 22, 2025, giingon ni Trump nga gidayeg niya ang determinasyon ni Marcos nga unahon ang interes sa nasod pinaagi sa pag-ingon “Make the Philippines great again.”
“I think he has to do what’s right for his country. I’ve always said, you know, make the Philippines great again. Do whatever you need to do,” matod ni Trump sa dihang gipangutana bahin sa baruganan sa foreign policy sa Pilipinas.
Gipasiugda ni Marcos nga ang foreign policy sa Pilipinas nakagamot sa soberanya ug prinsipyo, dili sa pagdula og geopolitical nga “tug-of-war.”
“There is no need to balance our relationship between the United States and China. Our foreign policy is an independent one,” matod ni Marcos, samtang gipamatud-an niya pag-usab ang pasalig sa administrasyon sa mga panag-uban base sa mutual respect ug international law.
Giabi-abi ni Trump kini nga pamaagi nga nag-ingon nga gitahod sa Estados Unidos ang kagawasan ni Marcos sa paglihok alang sa interes sa iyang nasud.
“I don’t mind if he gets along with China, because we’re getting along with China very well,” sumala ni Trump.
Si Marcos kinsa maoy mangulo sa Association of Southeast Asian Nations (Asean) sa 2026, niingon nga samtang ang US nagpabilin nga “labing lig-on nga partner” sa Pilipinas, ang nasod naglihok sab aron palig-unon ang relasyon sa ubang mga nasod nga nagpatunhay sa demokratikanhong mga mithi ug internasyonal nga balaod, ilabi na ang United Nations Convention on the Law of the Sea (Unclos). / JGS/SunStar Philippines