Magtiayon nga nagdumala sa nagsira nga Organico Agribusiness Ventures Corporation nga gipaubos sa Interpol Red Notice tungod sa giingong pagpangilad, gidakop sa mga awtoridad.
Sa ilang pamahayag, ang Criminal Investigation and Detection Group (CIDG) miingon nga ang magtiayon, giila nga sila si Cerrone ug Marve, nasikop sa Ninoy Aquino International Airport (NAIA) Terminal 1 niadtong Marso 26.
Ang mga warrant of arrest batok kanila giisyu sa nagkalain-laing mga korte sa Cebu, Davao, Tacloban ug Quezon City alang sa mga kasong swindling ug estafa.
Si Cerrone nalista isip "Regional Most Wanted Person" sa Central Visayas ug Eastern Visayas, ingon man National Most Wanted Person nga adunay P950,000 reward.
“I commend the CIDG Southern District Field Unit and Anti-Organized Crime Unit for capturing these fugitives. Job very well done. Today, we have put these two suspects behind bars and helped so many estafa and syndicated estafa victims attain the justice they deserve,” matod ni CIDG Director Major General Nicolas Torre III.
“Rest assured that your CIDG is steadfast in our fight against all forms of criminality and relentlessly in pursuing and catching these most wanted persons and criminals,” dugang niya.
Ang mga akusado nagpuyo sa San Juan Village, Bangkal, Davao City.
Nagkanayon ang CIDG nga si Cerrone, ang bana, nagsilbi isip presidente ug tsirman sa Organico.
Giakusahan ang kompanya nga nag-operate og Ponzi scheme, diin ang pagbalik sa kwarta makuha gikan sa pundo sa bag-ong mamuhunan.
Gikataho nga ang Organico misaad og "double-your-money" nga puhunan, sugod sa P3,600 nga bayad sa usa ka baktin nga mosaka ngadto sa P7,000 sud sa tulo ka buwan.
Gigamit usab sa kompanya ang crowdfunding aron magtanyag og shares.
Si Cerrone gikataho usab nga nagpadagan og negosyo sa Thailand isip managing director sa ERA Phetchaburi, usa ka komersyal nga ahensya sa real estate.
Niadtong Pebrero 2025, ang magtiayon temporaryong gidakop sa Royal Thai Police ug Immigration Officers sa ilang pinuy-anan sa Phetchaburi, Thailand human sa pagbawi sa permiso nga pagpuyo. / TPM/SunStar Philippines