Gilauman nga mahuman na karong semanaha ang imbestigasyon sa kamatayon sa usa ka mabdos kinsa nailhan nga si Airish Comaling, ug sa iyang anak niadtong Hulyo 22, 2025, tungod sa giingong kakulian sa pagpanganak niini human gi-refer sa tulo sa ka mga hospital sa Sugbo.
Subay niini, hugot ang baruganan ni Cebu Governor Pamela Baricuatro nga mag-atubang og tukmang silot ang mga mapamatud-an nga sad-an sa hitabo.
Gikumpirmar ni Dr. Elisse Nicole ‘Nikki’ Catalan, consultant on health sa Kapitolyo, sa Hulyo 30, nga gitiwas na nila ang imbestigasyon karong semanaha.
Matod ni Catalan nga gipaabot na lang niini ang tubag gikan sa Cebu South Medical Center (CSMC) sa Dakbayan sa Talisay, ang ikatulo ug uwahing hospital nga gitugpahan sa mag-inahan diin usab gideklara ang ilang kamatayon.
Sa nasayran, ang tulo ka mga hospital nga naglakip sa Isidro C. Kintanar Memorial Hospital sa Lungsod sa Argao, Carcar Provincial Hospital, ug CSMC ingon man ang mga opisyal ug personnel ang gipaubos sa imbestigasyon tungod sa maong hitabo.
“We are completing the investigation but what we are committed to is to finishing it this week, just to note nga ang death sa mother is sa Talisay so we really have to complete ang full investigation,” matod ni Catalan.
“I personally went to Carcar also, spoke with the chief of hospital. Initially ang mga nanggawas, naay inconsistency ato. She [Comaling] was still alive when she arrived there [Cebu South Medical Center - Talisay City],” dugang niya.
Ang Kapitolyo mipahibawo nga gawas nga moagi ang imbestigasyon sa health board, gipaubos na usab kini sa pagsusi sa Committee on Discipline and Investigation (CODI) nga maoy modeterminar ug morekomendar sa silot sa mga empleyado nga mapamatud-an nga sad-an sa hitabo. / ANV