Gibutyag ni Brgy. Ginebra Gin Kings coach Tim Cone nga na-dislocate ang tuhod sa usa sa iyang mga pambato nga si Jeremiah Gray atol sa ilang kadaugan batok sa NLEX Road Warriors, 91-85, niadtong Dominggo, Hulyo 30, 2023, atol sa pagtiklop sa Philippine Basketball Association (PBA) on Tour sa Ynares Sports Arena sa Pasig City.
Personal nga nihatod si Cone sa sophomore guard sa Medical City Hospital human sa insidente nga nahitabo sa 3rd quarter sa duwa.
"Jeremiah had a dislocated knee. The doctors were able to put the knee back in place and straighten it," matod ni Cone nga napatik sa www.spin.ph.
Sa inisyal nga pagsusi, gidudahan nga nakasinati og ACL ang 26 anyos nga magduduwa, sama sa iyang nasinati niadtong 2021 human sa iyang paghansak sa PBA 3x3 event ubos sa kampo sa TNT.
Si Gray, kinsa maoy No. 2 overall pick sa miaging tuig, nagpa-opera sa ACL niyang angol ug nagpa-rehab sa United States una kini nibalik sa nasod aron moduwa sa Ginebra sugod niadtong Commissioner's Cup sa miaging season.
"They are now in the process of evaluating the ligaments surrounding the knee," dugang ni Cone.
"No decisions have been made yet about surgery."
Wala pa masayri kon unsa gidugayon ang pagpaalim sa angol ni Gray.
Sa laing bahin, ang Gin Kings ninghuman sa pre-season event bawon ang 6-5 nga rekord samtang ang Road Warriors nagdala og 5-6 nga baraha.
Sa laing duwa, gipanglampornas sa Blackwater Bossing ang nagsalimoang nga TNT Tropang Giga, 101-78.
Ang Bossing adunay 7-4 nga rekord samtang ang Tropang Giga nangiwit dala ang 1-10 nga baraha. (ESL)