TULO ka tuig human makadawat og pagtugot, ang gisugyot nga tulay nga magdugtong sa Sabang ug sa gamay nga isla sa Pangan-an sa Lapu-Lapu City nagpabilin nga napugngan tungod sa pending nga environmental clearance gikan sa Department of Environment and Natural Resour-ces (DENR).
Matod ni Lapu-Lapu City Congressman-elect Junard “Ahong” Chan nga kabahin sa requirement sa proyekto ang pagsubay sa estruktura, ang policy-based nga pagdumala sa maapektuhang bakhawan, ug ang paggamit sa mga materyales nga giaprobahan sa DENR.
Gitug-anan ni Chan ang mga tigbalita niadtong Martes, Hunyo 17, 2025, nga gimando sa DENR ang pagtangtang sa usa ka bahin sa view deck nga gituman sa mga lokal nga opisyal ug nagpaabot sa resulta gikan sa ahensiya.
Samtang dunay maapektuhang bakhaw sa lugar, gibutyag ni Chan nga ang mga kanhi administrasyon sa DENR nitugot og mga alternatibo sama sa earthballing nga nakapasayon sa pagpatuman sa proyekto.
Apan iyang gitataw nga ang maong proseso wala na tugti nga naghatag og dugang kalisod ug komplikasyon sa pagpadayon sa proyekto.
Matod ni Chan, gipahunong ang pagtukod sa boardwalk human gikinahanglan sa DENR nga ang salog sa tulay himuon gikan sa solid hardwood.
Iyang gibutyag nga ang paggamit sa solid hardwood mogasto og gibanabana nga P46 milyunes, samtang kon semento ang gamiton mogasto lang ngadto sa P6 milyunes.
Gikuwestiyon sab ni Chan kung asa nila makuha ang gikinahanglan nga hardwood nga nisumpaki sa baruganan sa DENR sa pagpanalipod sa mga kahoy apan kahoy ang ipagamit alang sa proyekto.
Si Mayor-elect Cynthia “Cindi” King-Chan nga naggahin og gibanabana nga P300 milyunes alang sa mga proyekto, niingon nga siya ug ang iyang bana makigtagbo sa bag-ong DENR Secretary sa Hulyo.
Kini aron masiguro nga ang mga proyekto sa gobiyerno madayon nga hapsay ug maprotektahan ang kalikupan.
Ang ubang mga proyekto nga nagpaabot og clearance gikan sa DENR naglakip sa coastal road ug usa ka oval sa Barangay Looc.
Ang proyekto sa Sabang ug Pangan-an Bridge gisugdan aron mapalambo ang koneksyon ug mapagaan ang transportasyon tali sa mga importanteng barangay sa rehiyon.
Ang 2.6-kilometros nga tulay nagtumong sa paghatag og mas luwas ug lig-ong agianan alang sa mga residente, ilabi na nga makabenepisyo sa mga estudyante ug mga sumasakay nga maglisod sa transportasyon panahon sa low tide. / DPC