Tulisan gidimalas, nabalian paglayat

NADAKPAN: Giatiman sa mga polis ug medical personnel ang suspetsadong tulisan ug kawatan nga si Marlon Aying Ponsica, 25, taga Brgy. Kalunasan, dakbayan sa Sugbo dihang nadakpan sa Lunes sa buntag sa kalibunan sa Tuscania Garden, Brgy. Guadalupe diin siya nitago human sa gukdanay. Nakuhaan siya og kalibre .45 nga pistola ug mga kinawat. Estorya sa pahina 2. / TAMPO
NADAKPAN: Giatiman sa mga polis ug medical personnel ang suspetsadong tulisan ug kawatan nga si Marlon Aying Ponsica, 25, taga Brgy. Kalunasan, dakbayan sa Sugbo dihang nadakpan sa Lunes sa buntag sa kalibunan sa Tuscania Garden, Brgy. Guadalupe diin siya nitago human sa gukdanay. Nakuhaan siya og kalibre .45 nga pistola ug mga kinawat. Estorya sa pahina 2. / TAMPO

Nabali ang tiil sa usa ka notadong kawatan ug tulisan dihang napugos siya sa pag-ambak sa sapa dihang gigukod sa mga polis, apan nitugpa sa walay tubig sa Lunes sa alas 4 sa kaadlawon, Nobiyembre 6, 2023 sa Brgy. Guadalupe, dakbayan sa Sugbo.

Nakatago man tuod siya apan nasikop paglabay sa pipila ka mga oras kay wa na makabarog.

Tungod niini, ang suspek nga si Marlon Aying Poncica, 25, ulitawo, taga Stoneville, Brgy. Kalunasan, siyudad sa Sugbo, nalandig sa Cebu City Medical Center (CCMC).

Si Ponsica nasakpan human nakamata ang biktima nga si Faustino Sibi Jr., 61, minyo, taga Tuscania Garden, Brgy. Guadalupe, dihang gilungkab ang iyang panimalay.

Nakuha sa suspek ang jewel­ry box nga may sud nga assor­ted jewelries, cash ug lakip sa cellphone.

Si Sibi dali’ng nanawag sa ilang security guard sa subdivision ug dihang niresponde ang guwardiya, gipusil sab siya ni Ponsica apan wala maigo.

Daling niresponde ang kapulisan sa Guadalupe Police Station ubos sa kamandoan sa ilang hepe nga si Police Maj. Kenneth Paul Albotra.

Nahitabo ang ginukdanay ug ilang napiit ang suspek sa usa ka dapit sa subdivision apan nilayat sa sapa.

Gidimalas si Ponsica kay sa walay tubig siya nitugpa nga niresulta sa pagkabali sa usa sa iyang mga tiil.

Nakamaneho pa tuod siya sa pagtago, apan pagbalik sa mga polis sa dapit, napalgan siyang naghigda sa kasagbutan mga alas 8 na sa buntag sa Lunes.

Ang suspek nasakmitan og .45 kalibre nga pistola nga may usa ka magazine nga may tulo ka mga bala.

Na-recover sa kapulisan ang jewelry box nga may sud nga assorted jewelries nga balor tanan og P300,000, cash nga P28,630, cellphones nga moba­lor og P3,000.

Basi sa nakuhang impormasyon sa Superbalita Cebu gikan sa kasaligang tinubdan, ang suspek notado nga kawatan ug tulisan.

Daghan na ang ningreklamo nga sila gikawatan ug gilung­kaban ug may nag-ung-ong na nga warrant of arrest batok sa suspek.

Kasong robbery, kalapasan sa Republic Act 10591 o Comprehensive Firearms and Ammunition Regulation Act ug kalapasan sa Comelec gun ban ang mga kaso’ng atuba­ngon sa suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph