Nagtago-tago siya di lang gikan sa kapulisan, kon di gikan usab sa giingon nga mga hitman nga nangita kaniya tungod sa giingon nga iyang utang sa gidili nga drugas.
Mao kini ang giingon nga asoy ni Jiovanie Lagahit, alyas Banban, ngadto sa mga imbestigador sa Mabolo Police Station sa iyang pagtahan sa alas 11:30 sa Biyernes sa buntag, Nobiyembre 3, 2023 tungod sa kahadlok unsay mahitabo kaniya kon padayon nga magtago-tago.
Si Lagahit usa sa tulo ka mga suspek sa pagtulis sa usa ka coffee shop sa Salinas Drive, Brgy. Lahug, dakbayan sa Sugbo niadtong gabii sa Oktubre 30, 2023.
Siya ang nakita sa CCTV camera sa shop nga kauban ni Arvin Benedict Malolot nga nikuha sa cellphone ug bag sa usa ka lalaki nga kustomer nga nipalit lang unta og kape.
Si Lagahit giadto sa ilang balay sa Sitio Rio 2, Barangay Lahug, dakbayan sa Sugbo uban sa iyang inahan aron mo-surrender.
Usa ka police investigator nga nihangyo sa Superbalita Cebu nga di nganlan, niingon nga nahadlok, matod pa, si Lagahit nga mabalik sa Cebu City Jail tungod kay nakautang siya og drugs sa usa ka drug personality.
Giingon nga siya gihulga nga patyon kon mobalik.
Tungod sa iyang utang sa ilegal nga drugas, siya gipangita sa mga hitman sa maong drug personality, matod sa polis.
Si Lagahit nasikop na kaniadto sa Abellana Police station sa kasong paghupot og armas apan nakapiyansa.
Sa iyang pagkapriso, nagkaila sila sa drug personality nga wa niya nganli kon si kinsa.
Tungod sa tinguha sa ginikanan nga makustodiya siya sa kapulisan sa kabalaka nga dunay dautang mahitabo kaniya, nitabang kini nga makuha sa Mabolo Police Station sa pagpangulo sa hepe nga si Police Major Eraño Regidor.
Gibutyag ni Lagahit sa mga imbestigador sa Mabolo Police Station nga human nila natulis ang coffee shop, nidiretso sila sa dalan Colon ug gibaligya ang ilang nakuha nga cellphone sa lalaki’ng kustomer.
Human mabaligya, sila ningbalik sa Kamputhaw ngadto sa balay nilang Cyrus John Rallos ug nigamit og ilegal nga drugas.
Unang nadakpan si Rallos samtang nadakpan sa Mandaue City Police Office (MCPO) si Malolot.