‘Tulisan, killer’ nasikop tungod sa description

NADAKPAN DAYON: Si Kino Bacarro Aying, 25, taga Brgy. Talima, isla sa Olango, dakbayan sa Lapu-Lapu nasikop gilayon sa giingong pagtulis ug pagpatay kang Zenny Dondoyano Bazarte, 40, iyang kanhi kauban sa trabaho. Nailhan siya pinaagi sa paghulagway kaniya sa mga saksi nga suwangon. Nabawi sab ang salapi nga iyang nadala. / TAMPO
NADAKPAN DAYON: Si Kino Bacarro Aying, 25, taga Brgy. Talima, isla sa Olango, dakbayan sa Lapu-Lapu nasikop gilayon sa giingong pagtulis ug pagpatay kang Zenny Dondoyano Bazarte, 40, iyang kanhi kauban sa trabaho. Nailhan siya pinaagi sa paghulagway kaniya sa mga saksi nga suwangon. Nabawi sab ang salapi nga iyang nadala. / TAMPO

Wala ra maabti og usa ka oras, daling nasulbad ang pag­tu­lis ug pag dunggab patay sa usa ka babaye nga trabahante sa Alberto’s Pizza sa Don Gil Garcia St., Barangay Capitol Site, dakbayan sa Sugbo sa Biyernes sa alas 2:20 sa hapon, Disyembre 1, 2023.

Si Zenny Dondoyano Bazarte 40, kasamtangan nga nagpuyo sa maong lugar apan lumad nga taga Cansabusab, lungsod sa Poro, mga isla sa Camotes, probinsya sa Sugbo, gidunggab patay sa iyang kanhi kauban nga si Kino Bacarro Aying, 25, taga Barangay Talima, isla sa Olango, dakbayan sa Lapu-Lapu.

Dali nga nisibat ang suspek samtang gidala ang biktima sa labing duol nga pribado nga tambalanan apan nakabsan sa kinabuhi human nakaangkon og mga samad dinunggaban sa kalawasan.

Gidala sa suspek ang P197,050 nga bahinon unta sa mga empleyado sa dili pa ang Disyembre 24, 2023 aron magamit sa ilang pagsaulog sa Pasko.

NADAKPAN

Human nadawat ang tawag sa telepono sa Abellana Police Station gikan sa mga kauban sa biktima, dali sila nga nilusad og hot pursuit operation base sa paghulagway sa mga saksi sa suspek.

Matod ni Police Captain Mark Don Alfred Leanza, hepe sa Abellana Police Station, nga ilang nadakpan ang suspek sa Sitio Sadpa, Brgy. Sambag 2, dakbayan sa Sugbo.

Dali siya nga nailhan sa kapulisan base sa pamahayag sa mga saksi ug ang paghulagway niini nga budlat ang mga mata ug taas ang suwang.

Sa imbestigasyon sa Abellana Police Station, ang biktima ma­oy gihimo’ng tigdawat sa kwarta sa paluwagan sa mga kauban niini nga mga trabahante.

“Paspas namo nadakpan kay na interview man dayon namo ang mga witness didto. Dali ra ang pag describe ba kay ingon sila dako’g mata nya taas ang baba, tapos naglakaw ra,” asoy ni Leanza sa mga tigbalita sa Sabado, Disyembre 2, 2023.

Nakuha sa mga polis ang kwarta gikan sa suspek nga moabot og P197,050, lakip na ang kutsilyo nga gigamit sa krimen.

Nasayran sa Superbalita Cebu nga ang biktima ug suspek managkauban kanhi sa trabaho. Ang suspek usa na ka delivery rider.

Tungod sa dali nga kasulbaran, matod ni Leanza, nga gihatagan niya’g pasidungog ang lima ka mga polis nga maoy nakadakop sa suspek.

Iyang gibutyag nga una niya nga gimandoan ang iyang mga personnel nga kon dunay mga insidente sa huresdiksyon sa Abellana Police Station kinahanglan nga ang tanang personnel mogawas sa opisina ug motabang sa manhunt operation. (Dugang taho ni DVG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph