Naa na sa luwas nga kahimtang ang 26 anyos nga babaye human napusilan sa nagbinugtong nga tulisan nga gituohang naratol sulod sa PUJ nga nagbiyahian sa Talamban-Colon, Dakbayan sa Sugbo sa alas 11:20 sa Miyerkules Santo sa gabii, Marso 27, 2024 sa New Imus Road, corner General Maxilom Avenue, Brgy. Lorega San Miguel, Dakbayan sa Sugbo.
Ang biktima giila nga si Jemelita Balaba Salvador, 26, taga Nasipit, Talamban, ning dakbayan apan lumad nga taga Maasin, Southern Leyte.
Sa imbestigasyon sa Parian Police Station nasayran nga pulos mga pasahero sa PUJ ang biktima ug ang wala pa mailhi nga tulisan.
Sa pag abot sa maong lugar, kalit lang nideklarar og tulis ang tulisan, dayon gitiunan og armas ang biktima.
Apan sa dihang giingong nisuway sa pagsukol si Salvador, kalit nga nibuto ang dala nga armas sa tulisan ug naigo ang liog sa biktima.
Daling nisibat ang tulisan nga way nakuhang butang sakay sa laing PUJ nga dunay rota nga 03L sa MJ Cuenco paingon sa Carbon Public Market.
Samtang ang biktima gidala sa Perpetual Soccur Hospital sa Dalan Gorordo nga kritikal apan matod sa kapulisan naa na sa luwas nga kahimtang.
Si Police Major Henry Orbiso, hepe sa Parian Police Station, nagkanayon nga tungod sa karatol sa tulisan nga nisukol ang biktima, iyang nakablitan ang gatilyo sa armas.
“Pag resist sa victim, mao to ni kalit og buto, naigo sa neck. Pero stable na siya, nya walay nakuha sa gamit sa biktima. Dayon nikaratil pag dagan ang suspect,” butyag ni Orbiso.
Sa pagkakaron, ilang gipangsubay ang mga CCTV camera sa dapit nga hayan maklaro ang panagway sa tulisan.
Magpaabot sila nga moabli ang mga establisemento tungod kay nanirado kini ning taas nga bakasyon sa Semana Santa.