Tulisan nga nakita sa CCTV nailhan na

Cebu City map.
Cebu City map.

Nailhan na sa kapulisan sa dakbayan sa Sugbo ang nitulis sa duha ka mga babaye nga mga call center agent sa Purok 6, Sitio San Miguel, Brgy. Apas, dakbayan sa Sugbo sa Lunes, pasado alas 4 sa kaadlawon, Enero 8, 2024.

Matod ni Police Lt. Colonel Janette Rafter, deputy city director for operations sa Cebu City Police Office (CCPO), nga dili lang usa, kon dili duha ka mga lalaki ang nangalambigit sa maong pagpanulis base sa pamahayag sa mga saksi.

Wa una nganli ni Rafter ang usa sa mga suspek nga nakuha sa CCTV ug ang hulagway nikatap sa social media, apan iyang gipahibawo nga nagsulod-gawas na kini sa bilanggoan sa kasong pagpangawat.

Base sa record sa CCPO, lima na ka mga higayon nga nabilanggo ang maong lalaki, labing uwahi nakapahimulos sa plea bargain sa gobyerno.

Tungod niini, nilusad na og manhunt operations ang Mabolo police station sa pagpangulo ni Police Major Eraño Regidor batok sa duha ka mga tulisan.

“Kining tawhana taga Apas ra pud base sa pamahayag sa mga witnesses kay naklaro man iyang nawong. Ang atong Station 4 gitabangan na sa City Intelligence Unit sa pagpangita aning tawhana ni. More on robbery ang iyang previous nga kaso,” matod ni Rafter.

Dugang ni Rafter nga dali ra nailhan ang suspek tungod sa kuha sa CCTV camera diin naklaro ang panagway niini.

Ang biktima hingpit na nga nakaduso og reklamo sa Mabolo police station ug niangkon nga gamay ra ang nakuha gikan kaniya.

Apan bisan pa niini, desidido kini nga mopasaka og kaso batok sa mga tulisan.

KAWAT PALPAK

Sa laing bahin, ang coffee shop nga nahimutang sa Salinas Drive, Barangay Lahug gilungkab sa usa ka lalaki pasado alas 5 sa buntag sa Lunes, Pebrero 8.

Sa video nga mikatap sa social media, dili maklaro ang panagway sa kawatan kay nanabon kini apan matod ni Rafter nga duna na silay person of interest subay sa gidak-on sa lawas niini.

Dugang ni Rafter nga walay nakuha ang kawatan nga kwarta tungod kay gihipos na kini sa management human nabiktima sa pagpanulis niadtong Oktubre 2023.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph