SULOD lang sa singko minutos nadakpan sa Labangon Police Station ang nagtulis sa usa ka pharmacy sa dalan Katipunan, Barangay Tisa, Dakbayan sa Sugbo.
Ang nadakpan giila nga si Aubrey Viles Porral, 39 , taga Sitio Little Baguio, Barangay Mambaling.
Nahitabo ang pagpanulis sa pharmacy alas 4:45 sa hapon, Lunes, Agusto 11, 2025, gitayming nga wala na kaayo tawo sa sulod.
Gitiunan sa suspek sa dala niini nga armas ang cashier nga si alyas Cathy, 51, ug da-yong deklarar og tulis.
Nakuha sa suspek ang halin sa pharmacy nga mobalor sa P20,600 dala ang mga sinsilyo.
Dali nga nanawag ang mga trabahante sa kapulisan ug giradyohan dayon ang police patrollers nga nagkatag nang daan sa karsada ug wala pay singko minutos nadakpan ang suspek.
Nakuha sa kapulisan ang usa ka kalibre 38 nga pistola gikan kang Porral nga dunay duha ka buhing bala lakip na ang kuwarta nga iyang tinulisan.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office, nga ang dali nga pagkasikop sa suspek tungod sa gakatag nilang mga personnel sa mga strategic area sa matag police stations. / AYB