Marylove C. Vallena / Nagsuwat ug hulagway
Tulo ka adlaw ang among gigahin sa among super suroy sa Mindanao. Una namong giadto sa unang adlaw mao ang Bukidnon nga naila kaayo sa iyang maanindot nga mga talan-awon sa nagbawod nga kabukiran.
Ang Malaybalay City sa Bukidnon maisip gani nga laing summer capital sa sa Pilipinas tungod sa iyang bugnaw nga atmosphere.
Sa ikaduhang adlaw, ang among girumbo mao ang Isla sa Camiguin. Sa excitement, sayo mi nga nangmata ug nanglakaw aron sayo sa buntag toa na mi sa isla. Alas 2 sa kaadlawon, nanakay na mi og roro nga barko padulong sa isla.
Nilanat og dul-an sa duha ka oras ang among biyahe gikan sa pantalan sa Dakbayan sa Cagayan de Oro.
Sa among pag-abot sa pantalan sa Camiguin sa mga alas 6 sa buntag Enero 4, 2025, gisugat dayon mi sa drayber sa multicab nga maoy among gisakyan sa pagduaw sa nagkadaiyang tourist attractions sa isla sa Camiguin.
Una namong giadto ang White Island, inila kaayo nga sandbar mga 1.4 kilometro gikan sa lungsod sa Mambajao, ang capital sa Probinsiya sa Camiguin.
Walay bisan usa ka kahoy nga makasalipod nimo sa kainit sa adlaw, lunlon puti nga bas ang naghatag og kaanindot sa dapit.
Human mi natagbaw sa pagtampisaw sa iyang maanindot nga baybayon, namalik mi sa mainland aron pagduaw sa uban pang tourist destinations, usa na niini mao ang Sunken Cemetery.
Ang dapit nagpakita sa timaan sa bayolenteng pagbuto sa Bulkang Hibok-Hibok niadtong 1870s. Nalubong ang dapit sa lava nga naglakip sa sementeryo ug palibot niini. Usa ka cross ang nagbarog agi og marker sa dapit nga naigo og maayo.
Ang dapit naila usab nga diving spot niadtong gusto nga mosud-ong sa mga talan-awon sa ilawom. Apil sa makita usab sa dapit ang Old Church Ruins. Of course, wala namo kalimti ang sikat kaayo nga Tuasan Falls sa Brgy. Mainit, Lungsod sa Catarman. Aron among ma-feel ang iyang kaanindot, wala namo sipyata ang pagpangaligo.
Ang katapusan namong giduaw mao ang Katunggan Park boardwalk. Haom sa iyang ngalan kay ang boardwalk nga nagliko-liko naglibot man sa katunggan, diin maaninaw nimo ang kaanindot sa hangin ilawom sa mangroves.
Naa say mga payag nga imong maagian nga mahimo nimong pahulayan aron mas imong ma-feel ug mahanggap ang presko nga hangin samtang magsud-ong sa tin-aw kaayo nga tubig sa baybayon. Kon ganahan ka, mahimo ra kaayo kang maligo.
Wala kaayo mailhi kini nga dapit apan kon moadto ka sa Camiguin, ayaw sipyata ang pagduaw ning dapita. Dili ka gyud magmahay, labina kon imong kauban ang imong pamilya o di ba, ang imong “my one and only.”
Moadto pa unta mi sa Mantigue Island nga mabiyahe og mga 15 minutos gikan sa Camiguin Island, apan nahutdan na mi sa oras. Gikinahanglan na namo nga mobalik sa Cagayan de Oro City sakay sa barko nga roro sa alas 4 sa hapon sa samang adlaw.
Mubo ang among pagsuroy apan natagbaw mi sa among super suroy experience. /