Tulo ka puya nga patay na ang napalgan sa sulod sa usa ka compound sa Purok Sibukaw, Barangay Cotcot, Lungsod sa Liloan, Probinsya sa Sugbo alas 10:33 sa buntag, Biyernes, Hunyo 13, 2025.
Ang Liloan Police Station nakadawat og tawag sa telepono gikan sa trabahante sa JIP Plastic nga nahimutang sa maong lugar nga duna silay napalgan nga patay nga puya.
Dali nga niresponde ang kapulisan sa Liloan ug nakita ang maong mga puya nga gisud na sa plastic container.
Matod sa nakakita nga si Naciansino Gunato Bazarte, 46 taga Cotcot, Liloan nga samtang naghan-ay siya sa mga recyclable nga plastic nga gikan sa Negros, Bohol, ug Siquijor nakurat nalang siya nga ang usa ka plastic nga color blue dunay sulod nga tulo ka puya nga pulos na patay.
Ang ilang mga body parts kompleto na ug dunay wristband sa ilang bukton nga gituohan nga gikan pa kini sa usa tambalanan samtang ang ilang pusod dunay clamps.
Ang Liloan police nakig-alayon dayon sa mga sakop sa Liloan Emergency Risk Reduction and Management Council ug sa Municipal Social Worker alang sa himuon nga assessment ug pagsubay kung pila na kini ka adlaw human nahimugso.
Nihimo na usab og imbestigasyon ug backtracking ang kapulisan kon kinsa ang responsable sa pagpadala sa maong mga patayng puya./ AYB