Nakabsan sa kinabuhi ang drayber sa motorsiklo human niya naligsan ang iro nga nikalit og labang sa karsada ala 1 sa kadlawon, Dominggo, Agusto 3, 2025, sa Barangay Vito, Lungsod sa Balamban.
Ang biktima nga si Jason Sermon Palagtiw, 25-anyos, ulitawo, ug residente sa Barangay Aliwanay, Balamban, namatay human madala sa tambalanan sa maong lungsod.
Sumala ni Police Lt. Col. Ruel Burlat, hepe sa Balamban Police Station nga ang biktima nagsakay sa iyang Honda Click nga motorsiklo padulong mopauli dihang nikalit og labang ang libud-suroy nga iro, hinungdan nga iya kining gilihayan apan nawad-an siya og kontrol sa manobela ug nibangga sa konkretong poste daplin sa karsada.
Tungod sa kusog nga impact, nakaangkon og grabeng kadaot sa ulo ug kalawasan ang biktima nga gidala sa mga rescue personnel sa lungsod ngadto sa Cebu Provincial Hospital-Balamban apan namatay pagka-alas 4 sa kadlawon. / GPL