Tungod sa kwarta, asawa ‘mipapatay’ sa bana

Liloan, Cebu. (Google Maps)
Liloan, Cebu. (Google Maps)

Ang kuwarta gikataho nga nag-­aghat sa usa ka 30-anyos nga Pinay sa pakigkunsabo sa plano sa iyang kanhi hi­ni­gugma aron piangan ang iyang 72-anyos nga Japanese-­American nga bana, kinsa na­matay sa usa ka subdivision sa Barangay Yati, Liloan, Northern Cebu sa miaging buwan.

Giila sa National Bureau of Investigation (NBI) Region 7 ang mga nasikop nga gitumbok nga mga suspek nga sila si Roxan Mandokita Sugawara, asawa sa biktima, ug ang kanhi live-in partner niini nga si Gammy Tinaghanao Binungkasan,32, kinsa parehong niangkon sa krimen.(Gipugngan sa NBI ang ngalan sa biktima sa hangyo sa iyang pamilya.

Base sa autopsy report, ang biktima namatay tungod sa pagkatuok ug grabeng samad sa ulo. Ang Japanese-American nakaangkon og choke marks ug samad sa iyang ulo ug kamot.

Si Arnel Pura, NBI Cebu District Office (Cebdo) Agent-in-Charge, niingon sa usa ka press conference sa Lunes, Disyembre 11, 2023, nga ang babaye nga si Sugawara niangkon nga nagplano nga paralisahon ang iyang bana human sa init nga panaglalis nila kaniadtong Nob. 22. Si Pura niingon nga ang asawa nibutyag sa sinugdan sa iyang kaugalingon nga plano apan napakyas siya sa pagbuhat niini dihang naluoy siya sa iyang bana.

Gikontak hinuon niya ang iyang kanhi live-in partner aron moanhi sa Sugbo gikan sa Cagayan De Oro (CDO) ug mohimo sa iyang ideya alang kaniya sulod sa ilang pinuy-anan, apan ang naulahi nipatay sa iyang bana niadtong Nobiyembre 25.

Aron pagtabon sa krimen, ang Pinay niingon nga gipasagdan niya ang iyang kanhi hinigugma nga magdala sa ilang mga butang sa wala pa mobiya sa lugar ug nitaho sa insidente ngadto sa Lilioan Police nga daw gitulis sila sa iyang bana.

Apan, ang ginang niingon nga dili na siya makatulog human niadto ug kanunay nga gihasol sa iyang sala, rason nga iyang gitug-an. Nakig-alayon ang kapulisan sa NBI ug gidakop siya niadtong Disyembre 6.

Human niini, si Pura nagka­nayon nga nihimo dayon sila og hot pursuit operation ug nasikop ang nag-unang suspek sa construction site nga iyang gitrabahoan isip construction worker sa Upper Balulang, dakbayan sa Cagayan De Oro, Misamis Oriental sa Disyembre 8 sa hapon.

SAAD

Sa pakighinabi sa media niadtong Lunes, ang asawa niingon nga nagsugod siya og kasuko sa iyang bana dihang siya gisaaran sa naulahi og kuwarta nga moabot og P100,000 nga wala gyud niya madawat.

Matod niya nga misamot ang iyang kasuko dihang gibalibaran sa biktima ang iyang tanyag nga makuha ang pension money sa iyang pagtugot.

“Daghan kaayo siyag gipasalig sa akoa motabang daw sya’s akong pamilya, tagaan ko niya’g P3.6 million nga balay dayon mag share account mi pero wala’y usa natinuod. Maong nalain ko nakahuna huna ko sa iyaha,” matod niya.

Matod niya nahimamat niya ang langyaw sa social media niadtong Abril. Nagpakasal sila niadtong Oktubre.

Sa laing bahin, gikompirmar ni Binungkasan ang plano sa iyang kanhi live-in partner, apan matod pa niya nga dili niya mapasabot ang iyang gibati niadtong adlaw sa insidente nga maoy hinungdan sa iyang pagpatay sa bana sa babaye.

“Oh among sabot piangan lang pero naglain naman akong buot atong gipaundang nako’ng Roxane og dapat sa iyang bana. Mao to mibalik ko sa kwarto nga wala siya kahibaw, gihapak nako ang ulo sa Amerkano og botilya unya gisiko nako siya,” dugang pa niya.

Sila si Sugawara ug Binungkasan halos napulo ka tuig nga live-in partner, adunay tulo ka mga anak, apan matod sa babaye nakigbuwag siya sa iyang live-in partner tungod sa iyang “toxic traits.”

Matod ni Pura nga nakig-alayon pa sila sa kapulisan sa Liloan aron makakuha og dugang mga ebidensiya alang sa kaso.Ang duha anaa sa kustodiya sa NBI Cebdo sa Barangay Centro, dakbayan sa Mandaue.

Si Pura nagkanayon nga si Su­gawara mag-atubang og kasong parricide samtang si Binungka­san sa kasong murder.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph