BISAN sa katapusang adlaw kagahapon sa katungdanan alang ni outgoing Cebu City Mayor Raymond Alvin Garcia, busy gihapon kaayo siya sa trabaho nga naglakip sa iyang pagpirma sa Zoning Ordinance, gihimo ang iyang state of city address, ug gitunol ang opisyal nga selyo ngadto sa Mayor-elect Nestor Archival niadtong Lunes sa buntag, Hunyo 30, 2025.
Sa buntag sa Hunyo 30, ang kanhi Mayor sa Cebu City nga si Garcia nangulo sa iyang katapusang seremonya sa pag-isa sa bandila sa Plaza Sugbo, Cebu City nga nagtimaan sa pagtapos sa iyang hapit usa ka tuig nga termino.
Mga oras sa dili pa moluwat sa katungdanan, gihatod ni Garcia ang iyang end-term report nga naghatag og gibug-aton sa mga talagsaong proyekto ubos sa iyang termino nga naglakip sa pagbiya sa siyudad nga way utang, lig-on nga cash reserves, ug nagpadayon nga imprastraktura ug mga proyekto sa panglawas nga makabenepisyo sa mga Sugboanon sa umaabot nga katuigan.
Sa iyang year-term report, gitaho ni Garcia nga sa karon nga tuig, ang Cebu City adunay P12.1 bilyunes nga cash assets, lakip na ang P7.9 bilyunes sa General Fund, P1.5 bilyunes sa Trust Fund, P2.5 bilyunes sa Special Education Fund, ug kapin sa P110 milyunes sa dollar accounts.
“We achieved this without implementing tax rates that would have negatively affected our employers and taxpayers,” ingon ni Garcia nga naghatag og gibug-aton nga ang siyudad nagpabilin nga “lig-on sa panalapi, responsive sa sosyal, ug lig-on sa institusyon.”
Gibutyag ni Garcia nga sa panahon sa iyang termino, gisiguro sa Cebu City ang road right of way alang sa
Cebu Bus Rapid Transit (BRT) project bisan pa sa unang mga kabalaka bahin sa epekto niini nga makatabon sa view sa Cebu Capitol building.
Ang siyudad nakakuha sab og mga tow truck, gipalambo ang trabaho sa mga traffic personnel, ug gipasiugda ang intermodal systems ug underground cabling aron masulbad ang kahuot sa trapiko ug maminusan ang mga piligro sa sunog nga mahitabo sa mga overhead wire.
Sa pagpalambo sa serbisyo, gitumbok ni Garcia ang mas paspas, mas transparent, ug sentro sa serbisyo sa gobiyerno, kauban ang mga lakang pag-atiman sa panglawas nga mas duol sa katawhan.
Iyang gikutlo ang operasyon sa Apas Super Health Center, gi-upgrade nga mga pasilidad sa Guba Hospital lakip ang bag-ong laboratory equipment ug usa ka x-ray machine, ug ang nagpadayon nga pagkompleto sa Cebu City Medical Center.
Ang siyudad naggahin usab og P30 milyunes alang sa maintenance medicines ubos sa iyang Preventive Healthcare and Medicines Program.
Si Garcia nagpasalamat sa Cebu City Council, iyang mga department head, empleyado, campaign team, ug pamilya alang sa ilang suporta sa tibuok niyang termino. / John Mart Mabalhin, VSU intern ug Hilary Natalie Berongoy HNU, Intern