Tutokan sa Team: Trapiko, di violators

Tutokan sa Team: Trapiko, di violators

Sa nagsingabot nga holiday season, ang Traffic Enforcement Agency of Mandaue (Team) niingon nga ilang unahon ang traffic regulation kay sa pagdakop sa mga traffic violators aron maseguro nga maayo ang traffic situation sa Mandaue ug dili makabalda sa mga sumasakay sa pagdagsang sa mga holiday shoppers.

Si Hyl Retuya, legal division head sa Team, niingon sa Martes, Disyembre 12, 2023, nga ilang namatikdan ang pagsaka sa trapiko sa dakbayan sa Mandaue, ilabi na sulod sa mga dapit duol sa mga shopping malls, nga matod niya normal lang panahon sa holiday season.

Dili matino ni Retuya ang gidaghanon, apan siya miingon nga mas daghan pa ang ilang gipakatap nga mga personahe sa Team sulod sa mga intersection duol sa mga shopping malls. Kini, gawas sa mobile patrolling sa departamento.

Lakip sa shopping malls sa Mandaue City mao ang City Times Square sa Barangay Tipolo, Pacific Mall sa Maguikay, Gaisano Grand Mall sa Centro, ug Gaisano Grand Mandaue North sa Basak.

Dugang niya nga ilang gimanduan ang ilang mga personnel nga unahon ang traffic regulation ug dakpon lang kadtong mga bug-at nga traffic violators aron dili makabalda sa dagan sa trapiko.

“Of course mga tawo moadto sa malls mag shopping kay bisan asa naay sale. Daghan pud mga private vehicles nanggawas na aron mamalit. So, atong gibuhat sa Team mas ni focus ta didto. Ug sa atong drivers usab naminusan ilang loop tungod sa traffic. Ang kanhi 15 loops karon 12 na lang,” ni Retuya.

Gawas sa mga mall, si Retuya niingon usab nga ilang gitinguha nga palig-unon ang monitoring sa ilegal nga giparking nga mga sakyanan.

Sa laing bahin, si Raul Abellana, general manager sa Lapu-Lapu Mandaue Drivers Operators Transport Cooperative (Lamadotrasco), niingon nga aduna na silay 24 oras nga operasyon aron matabangan ang gidaghanon sa mga pasahero sukad pa niadtong miaging semana.

Bisan og dili makahatag og mga numero, si Abellana niingon nga ilang naobserbahan nga ang gidaghanon sa mga pasahero nga ilang gi-cater kada adlaw misaka ngadto sa labing menos 20 porsiyento.

“Kasagaran na, labi na kon hapit na ang Pasko. So, kasagaran namong gi-extend ang among operations,” matod ni Abellana.

Siya niingon nga ang mga drayber karon nag-double shifts aron mapaabot ang mga sakay sa mga pasahero.

Sa pagkakaron, ang Lamadotrasco adunay 175 ka modern public utility jeepney (PUJ) units nga mobiyahe paingon sa Lapu-Lapu ngadto sa Mandaue, Cabancalan ngadto sa Hernan Cortes ug vice versa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph