Niumol og technical working group (TWG) si Cebu Governor Gwendolyn Garcia nga maoy mosusi sa gilaraw nga roundabout nga mopalambo sa sitwasyon sa trapiko sa mga eskina sa UN Avenue ug Plaridel St. sa Dakbayan sa Mandaue.
Kini gipaagi sa Memorandum 19-2024 subay sa nadesisyunan ni Garcia atol sa tigom niini kauban sila si Board Member Glenn Soco, Subangdaku Barangay Captain Ernie Manatad ug mga opisyal sa Department of Public Works and Highways (DPWH) 7.
Gawas sa gobernador, lakip sa mga miyembro sa maong grupo sila si Engr. William Christopher Liu Jr., Engr. Fortunato “Jun” Sanchez, Mr. Michael Lhuillier, ug Atty. Manolette Fel Dinsay alang sa paghimo og mga plano ug rekomendasyon sa hingpit nga pagpatuman niini.
Ang na-identify nga intersection anaa nahimutang sa tiilan sa taytayan sa Marcelo Fernan sa naasoy’ng siyudad, paingon na sa Cansaga Bay Bridge sa amihanan.
Nasayran nga ang maong karsada maoy usa sa labing lisod agian tungod sa huot nga sitwasyon sa trapiko.
Hinungdan nga kon kini mahimoan og roundabout o rotunda sama sa Fuente Osmeña, gilauman nga mas mapaluagan ang trapiko sa lugar.
Subay niini, gipasalig sa Kapitolyo nga andam kining motabang sa apektado’ng mga residente kinsang mga balay mangaapektuhan sa giplano’ng rotunda. / ANV