USA si Cuban Yordenis Ugas sa mga boksidor nga nigamit sa social media aron ipadayag ang ilang pagdayeg ni Filipino boxing legend Manny Pacquiao human sa gipakita niining away batok ni World Boxing Council (WBC) welterweight champion American Mario Barrios.
Matod ni Ugas kinsa maoy katapusang nakontra ni Pacquiao una kini niretiro kaniadto, daw dili siya makatuo sa gipakita sa 46-anyos nga Pambansang Kamao ng Pilipinas sa away niini batok sa 30-anyos nga si Barrios nga niresulta sa majority draw.
“I’d heard all along that the Pacquiao who fought me was finished, dead, nothing,” mensahe ni Ugas sa X, kanhi Twitter, nga napatik sa GMA Integrated News.
Sa iyang pagpakig-away ni Pacquiao niadtong Agusto 21, 2021, nirehistro si Ugas og unanimous decision nga kadaugan. Human niini, niretiro si Pacquiao.
“How is it possible that four years later he comes against a kid 16 years younger and puts up another good fight?” dugang ni Ugas kinsa gipilde ni Barrios pinaagi sa unanimous decision sa ilang away niadtong 2023. / ESL