Naandang biyahe padulong sa isla sa Bantayan moabot og unom ka oras gikan sa siyudad sa Sugbo, apan pwede na karon sud sa 30 minutos sakay sa abyon sa Mactan Cebu International Airport MCIA) nga nagsugod sa Miyerkules, Agusto 28, 2024.
Ang paspas nga biyahe padulong sa Bantayan island gilauman nga makadugang sa kasayon sa pagdala og mga produkto ug uban pang kalihokan sa isla lakip sa iyang kasikbit nga kalungsoran sa isla nga mao ang Santa Fe ug Madridejos.
Sa biyahe gamit ang mga bus, mogasto og P300 ug P359 alang sa shuttle ferry uban sa P45 nga terminal fee nga mosumada og P704 alang sa usa ka unom ka oras nga biyahe.
Apan sa paglupad sa abyos, gawas sa pakunhod sa oras sa biyahe, dunay pletihan nga P888 ubos sa promusyon sa pagkakaron.
Nagpasabot kini sa mas daghan nga paggasto sa pagkaon ug uban pang kalihokan nga mahimong magdala og dugang nga kita sa mga lungsod sa Santa Fe, Madridejos, ug Bantayan.
Makatabang kini sa ekonomiya sa industriya sa turismo sa island kay kini makapamugna og mas daghan nga trabaho, makapadugang sa kita sa mga tawo, ug makasuporta sa mga negosyo, lakip na ang mga mag-uuma ug mananagat nga makabenepisyo usab.
Ang unang flight giubanan ni Cebu Gob. Gwendolyn Garcia, Santa Fe Mayor Ithamar Espinosa, Bantayan Mayor Arthur Despi, Madridejos Mayor Romeo Villaceran, Mactan Cebu International Airport Authority General Manager Julius Neri Jr., mga Board Members nga sila Kerrie Keane Shimura ug Glenn Anthony Soco, uban pang mga opisyal ug bisita. | CDF