Alang sa ika-50 nga Metro Manila Film Festival lakip ang thriller movie nga bida si Star For All Seasons Ate Vilma Santos nga "Uninvited."
Si Ate Vi lakip nga makiselebrar sa ikalima nga dekada sa MMFF diin usa siya sa mga nag-unang artista sa nasod nga aduna'y entry dihang nagsugod pa ang MMFF niadtong 1975.
Nasayran nga ang entry ni Ate Vi karong tuiga, iyaha mismo nga ideya. Matod sa executive producer sa maong salida nga si John Bryan Diamante sa Mentorque nga tungod kay kaila sila sa beterana nga aktres ug suod sab, dugay na sila nga gusto nga magkatrabaho. Apan tungod sa kadugay na ni Ate Vi sa industriya, gusto sa aktres nga mangita o mamili og estorya nga wala pa niya mabuhat.
Gani gibutyag nila nga tungod kay dili nila gusto nga putlon ang bisan usa ka esksena sa maong salida, nahimo kini nga Rated 16.
Kabahin sa pagpanimawos ang maong estorya ug sa injustice nga nahitabo karon sa kasamtangan.
Si Ate Vi modala sa role ni Eva nga namatyan og anak ug manimawos sa bilyonaryo nga si Guilly nga karakter usab ni Aga Muhlach. Niadtong Dominggo, Disyembre 8, nibisita ang casts sa "Uninvited" sa Sugbo aron i-promote ang ilang salida.
Gawas sa mediacon ug fancon, mituyok usab kini sa pipila sa nag-unang kadalanan sa Dakbayan sa Sugbo pinaagi ang motorcade.
Ang Mentorque nga mao usab ang ni-produce sa Mallari niadtong nakalabay nga tuig, nibutyag nga ang Sugbo ang usa sa aduna'y dako nga market alang sa mga salida sa nasod.
Mao kini ang rason nga engrande ang ilahang pag-promote sa ilang salida sa Sugbo.
Lakip nga nakilingaw sa mga Sugbuanon sila si Aga Muhlach, Nadine Lustre, Tirso Cruz III, Mylene Dizon, Ron Angeles, RK Bagatsing, Cholo Barretto ug ang direktor niini nga si Dan Villegas. /