Mga duwa karon:
5:00 pm- Magnolia batok TNT
7:30 pm- NLEX batok Rain or Shine
Dili usa, kon dili duha ka mga tinaktakay nga mga kombati ang masaksihan karong Sabado, Hunyo 21, 2025, sa quarter-finals sa Philippine Basketball Association (PBA) Season 49 Philippine Cup.
Sa premirong duwa, ang Grandslam-seeking TNT Tropang 5G makigsangka sa Magnolia Chicken Timplados Hotshots sugod sa alas 5:00 sa hapon samtang mag-abot sa main game ang NLEX Road Warriors ug Rain or Shine Elasto Painters.
Isip benepisyo sa ilang pagkasulod sa Top 4 human sa elimination round, parehong naggunit og kaduha-pildehon nga bintaha ang Hotshots ug Road Warriors apan nahanaw na kini human sila gipangbuntog sa ilang tagsatagsa ka kontra niadtong Miyerkules, Hunyo 18.
Dili ikalimod nga nakabaton og psychological advantage ang Tropang 5G ug Elasto Painters nga seguradong makatabang kanila ning krusyal nga mga panagsangka.
Nagkanayon si TNT coach Chot Reyes nga wala sila maghunahuna og maayo kabahin sa ilang tinguha nga maangkon ang talagsaong Grandslam title ug nagtutok lang una sila’g maayo ning sangkaa.
“Ang iniisip lang namin is that we’re coming back and we’re playing on Saturday,” matod ni Reyes nga napatik sa www.pba.ph.
Ang Hotshots usa sa upat ka mga prangkisa nga nakabaton na og Grandslam title apan human sa ilang paghari sa 2018 Governors’ Cup, wala na kini nakatilaw og kampyunato.
Niini, dili ikalimod nga grabe na sab ang kahidlaw sa Hotshots.
Sa laing duwa, si Rain or Shine coach Yeng Guiao nagkanayon nga nagkinahanglan sila og suwerte aron mausban nila pagbuntog ang Road Warriors, nga maoy No. 2 team human sa elimination round.
“Ang tingin ko sa series na ito ibigay mo ang kaya mo, magtrabaho ka, at the end of the day there’s the luck involved. Pwedeng one or two possessions lang ang magiging diperensya,” asoy ni Guiao.
“May halong swerte. Pero ang swerte dadating sa iyo kapag kinayod mo at kapag nagsipag ka which we did.” / ESL