Upat ra sa 65 ka property developers nga gihangyo sa Cebu City Government nga mosumiter sa ilang flood-mitigation plans ang nakatubag hangtod karon.
Kini samtang nag-andam na ang siyudad sa pagkonsolidar sa mga gisumiter una pa ang giplanong field validation.
Si La Paloma nagsumiter sa ilang tubag niadtong Agusto 19, 2026, gisundan sa Monterrazas de Cebu ug Amari Residences niadtong Agusto 20, samtang ang Apple One nagsumite sa ilang tubag niadtong Agusto 24.
Matod sa chief of staff ni Mayor Nestor Archival, Kenneth Siasar, nakapadala na ang siyudad og mga suwat ngadto sa tanang 65 ka developers nga giila alang sa imbestigasyon diin gihangyo sila nga mosumiter sa ilang development ug flood-control plans alang sa pagrepaso.
Apan upat pa lang ka developers ang nakasumiter sa ilang mga tubag, matod ni Siasar.
Ang lakang sa siyudad nitumaw taliwala sa nagpadayon nga kabalaka bahin sa pagbaha sa Cebu City, ilabina sa mga komunidad nga nahimutang ubos sa mga hillside developments.
Una nang mipahayag ang siyudad nga itandi niini ang mga planong gisumiter sa mga developers sa aktuwal nga anaa sa ground, lakip ang mga gikinahanglang flood-mitigation facilities.
Una nga nagtakda ang City og deadline niadtong Agosto 17 alang sa mga developers sa pagsumiter sa ilang mga dokumento, apan matod ni Siasar, adunay pipila ka developers nga nangayo og extension.
Matod niya, gitan-aw na karon sa City ang Agosto 27 isip target date sa pagkolekta ug pag-consolidate sa mga dokumentong gisumiter aron ma-report kini kang Archival. / CAV