Aron suportahan ang ilang giplano nga pag-upgrade ngadto sa usa ka Level 1 nga pasilidad sa medikal, ang Daanbantayan District Hospital nagpahigayon sa groundbreaking sa usa ka P22.4-million infrastructure package niadtong Sabado, Agusto 22, 2026.
Sumala sa pahayag gikan sa Facebook page sa Cebu Province Public Information, atol sa inagurasyon nga gipangulohan ni Gobernador Pamela Baricuatro uban sa mga lokal nga opisyal ug sa Capitol Piso Health Consultant nga si Dr. Nikki Catalan, ang proyekto sa pagpalapad sa Daanbantayan nagtutok sa mga importanteng dugang nga pasilidad.
Naglakip kini sa bag-ong mga building para sa outpatient department ug pharmacy, dietary services, linen ug laundry, hazardous waste storage, morgue, ug parkinganan sa ambulansya.
Gipundohan usab niini ang pag-ayo sa emergency room, laboratory, radiology unit, business office complex, ug perimeter fence.
Nag-operate isip usa ka 10-bed infirmary sa wala pa kini gipalapad ngadto sa 22 ka higdaanan niadtong Hunyo 2025, ang pasilidad nagtumong nga makab-ot ang Level 1 status aron makahimo og minor surgical procedures ug tuldokan ang kanunay nga kakuwang sa supply sa lugar.
Sa laing bahin, ang Kagamhanan sa Probinsya sa Sugbo nagbutang og usa ka bag-ong mammogram machine ug nisaad og P13.4 milyon alang sa pag-ayo sa imprastraktura sa Cebu Provincial Hospital–Bogo City (CPH-Bogo).
Ang bag-ong mammogram machine sa CPH-Bogo nagpalambo sa kapasidad sa ospital alang sa sayo nga pag-diagnose sa mga hubag sa dughan, cyst, ug posibleng mga timailhan sa kanser.
Nagsilbe kining sumpay sa nakuhang bag-ong mga specialized medical equipment lakip na niini ang laparoscopy machine, C-arm imaging system, anesthesia machines, ug electrocardiogram units.
Ang gigahin nga pundo sa pag-ayo gipahibalo atol sa usa ka dungan nga medical ug dental missions, diin gikompirmar sab sa mga opisyal nga ang mga medikal nga kawani sa CPH-Bogo manumpa isip mga regular nga empleyado sa gobiyerno karong Miyerkules, Agusto 26. / CDF