Kon dunay gusto pa nga mapuno ang legendary shooter nga si Stephen Curry sa iyang career mao kini ang paglambo sa iyang posisyon sa National Basketball Association (NBA) all-time scoring list.
Ang 37 anyos nga si Curry dunay upat ka NBA championship, duha ka Finals MVP award, 11-time All-Star, ug gitawag pud nga greatest shooter.
Apan para niya naa pay pwede mapuno sa iyang masidlakon nga NBA career. Mao kini ang pagsaka sa NBA scoring list.
Si Curry naglingkod sa ika-24 nga posisyon bitbit ang 25,386 puntos sukad pagsulod niya sa liga tuig 2009 isip 7th overall pick sa Golden State Warriors.
Sa miaging season, nag-average si Curry og 24.5 puntos ug nag-una sa NBA free throw percentage (91.1%). Nakahimo siya og 1,718 puntos.
Kon makabuhat si Curry og susamang puntos sa umaabot nga season maapsan niya ang legend nga si Hakeem Olajuwon ug mosaka siya sa ika-14 nga pwesto.
Ang player nga nakahimo og pinakadaghan nga puntos sa regular season mao si LeBron James (42,184) gisundan ni Kareem Abdul-Jabbar (38,387), Karl Malone (36,928), Kobe Bryant (33,643) ug Michael Jordan (32,292).
Lakip sa Top 10 mao sila Dirk Nowitzki (31,560), Wilt Chamberlain (31,419), Kevin Durant (30,571), Shaquille O’neal (28,596), ug Carmelo Anthony (28,289).
Pero matod pa ni Curry nga gusto man tuod niya mosaka sa all-time scoring list, apan di kini ang priority sa iyang karera karon.
“That’s not why I’ll keep going,” batbat ni Curry. “It’s more that I want to get to a level where we’re competing and playing for championships.”
Ang Warriors nakasulod sa playoffs sa miaging season apan gitakag kini sa Minnesota Timberwolves sa second round sa Western Conference playoffs. / RSC
