Usa ka proposal nga usbawan ang inadlaw nga suholan sa job order (JO) nga mga garbage collector gikan sa P468 ngadto sa P700 ang giduso sa mga opisyales sa Dakbayan sa Lapu-Lapu, tungod sa lisod nga kahimtang sa klase sa trabaho.
Si Jocelyn Abayan, Supervising Environmental Management Specialist sa City Environment and Natural Resources Office (Cenro), miingon sa mga tigbalita kabahin sa ilang plano nga mohangyo sa City Council aron himuong permanente ang usa ka espesyal nga suweldo alang sa mga JO personnel nga nadestino sa pagkolekta og basura.
Ang gisugyot nga kausaban makadugang sa inadlaw nga sweldo og P232 alang sa 140 ka mga tigkolekta og basura sa siyudad.
Giangkon ni Abayan nga dili sayon ang maong proseso, tungod kay kinahanglan pa kini nga moagi sa city council.
Bisan pa, iyang gipasiugda nga ang proposal importante sa mga JO personnel hilabina nga wala silay insurance.
"Their work isn’t easy and they need to be properly compensated because they’re doing their job, yet their pay is the same as the standard minimum rate," matud ni Abayan.
Ang pundo nga gamiton alang sa wage increase adto kuhaon sa kita sa P100 environmental fee nga ordinansa alang sa watersports ug recreational activities nga gi-implementar niadtong Mayo 1 sa miaging tuig.
Gawas sa pagtaas sa suweldo, ang Cenro nagplano nga mopalit og unom ka bag-ong mga garbage truck gamit ang pundo gikan sa environmental fee.
Ang siyudad adunay siyam ka naglihok nga mga garbage truck. Gikumpirmar usab ni Abayan nga ang giproponer nga mga tourist hub sa mga pantalan nga nalangan tungod sa eleksyon ipadayon karong tuiga. / DPC