USC
USC(Photo by Yans Baroy)

USC Law ika-3 sa tibuok nasod sa 2023 bar exams, nakatala og 91% passing rate

Naa sa ikatulo nga pwesto ang University of San Carlos (USC) sa nag-unang lima ka mga law school sa nasod nga nakabaton sa pinakataas nga passing rate sa 2023 Bar examinations.

Nakapasar ang 90.91 porsiyento sa mga ningkuha sa pasulit gikan sa USC College of Law itandi sa 36.77 porsiyento nga national passing rate sumala sa datos nga gipagawas sa Korte Suprema sa Disyembre 5, 2023 mahitungod sa bag-ong bar exams.

Uban sa 170 ka malampuson nga bar passers, ang USC ang nag-inusarang unibersidad dinhi sa Sugbo sa mga top-performing law schools nga adunay kapin sa 100 ka mga kandidato sa tibuok nasod.

“Ang kalampusan sa atong mga gradwado sa Law sa pagpasar sa bar sa mga katuigan nagpakita sa kalidad sa edukasyon sa balaod nga gihatag sa USC College of Law sa atong mga tinun-an,” miingon si Joan S. Largo, bise presidente sa USC alang sa administrasyon ug kanhi Law dean.

“Giila sab nato ang di hi­tupngan nga dedikasyon sa a­tong law faculty, ug ingon man sa suporta sa USC admi­nistration,” siya nidugang.

Misaka ang USC Law sa laray sa pinakataas nga passing percentage sa ika-3 niining 2023 Bar Examination, gikan sa ika-4 sa miaging tuig, siya nipaambit.

Sulod sa mga katuigan, kanunay ang USC Law nga mahimutang sa usa sa mga labing maayo nga mga tunghaan sa balaod sa nasod.

Atol sa 2020-2021 Bar Exams, ang USC Law’s Batch 2020 adunay 98.13 passing rate, samtang ang Batch 2021 nakakuha og 98 porsyento.

Mokabat sa 3,812 gikan sa 10,387 ka bar takers ang ma­lampusong nakapasar sa 2023 Bar examinations nga gidumala ni Associate Justice Ramon Paul Hernando isip bar chair.

Related Stories

No stories found.
SunStar Publishing Inc.
www.sunstar.com.ph