Human siya nahimong undisputed heavyweight champion ning bag-uhay lang, naapsan ni Ukranian Oleksandr Usyk si super bantamweight undisputed champion Japanese Naoya “Monster” Inoue sa prestihiyusong pound-for-pound ranking sa The Ring Magazine.
Si Inoue, kinsa miilog sa No. 1 spot gikan ni American Terence Crawford human sa iyang kadaugan batok ni Luis Nery sa sayong bahin ning buwana, nibalik sa ikaduhang puwesto.
Nailog ni Usyk gikan ni Inoue ang No. 1 nga puwesto human sa iyang split decision nga kadaugan batok kang Tyson Fury.
Si Crawford midakin-as sa ikatulong dapit, anaa sa ikaupat si Mexican superstar Saul “Canelo” Alvarez ug ikalima si unified light heavyweight champion Artur Beterbiev.
Naglingkod sa ikaunom ngadto sa ika-10 nga dapit mao sila si Dmitry Bivol, Errol Spence Jr., Gervonta Davis, Jesse Rodriguez, ug Junto Nakatani. / ESL