Nadakpan sa mga sakop sa San Fernando Municipal Police Station ang usa sa upat ka mga mamumuno nga nipusil-patay sa usa ka 28-anyos nga lalaki sa Barangay Greenhills, Lungsod sa San Fernando, niadtong Huwebes sa gabii, Agusto 20, 2026.
Ang nasikop giila nga si Chris, 29, nga molupyo sa Barangay Sangat sa maong lungsod.
Si Chris nadakpan atol sa gilusad nga hot pursuit sa tracker team sa San Fernando Police alas 11:00 sa buntag, Biyernes, Agusto 21, 2026, didto sa Barangay Sangat.
Base sa imbestigasyon sa kapulisan ug sa pamahayag sa mga saksi, upat ka lalaki ang nagpaluyo sa pagpatay kang Vincent Repaso Romo, 28.
Duha sa mga suspek ang nailhan nga mao si Chris ug ang usa nga naila lang sa alyas nga "John."
Gipadayag sa kapulisan nga si Galo ug alyas John ang nagpuli-puli sa pagpusil sa biktima, samtang ang laing duha ka kauban nagsilbing "lookout" ug dungan nga nisibat human sa pagpamusil.
Personal nga atraso nga may kalambigitan sa ilegal nga drugas ang gitan-aw nga motibo sa krimen.
Gikataho nga nakautang ang biktima og shabu sa mga suspek ug wala kini makabayad, nga maoy hinungdan sa kasuko ug sa pagpatay kaniya.
Kahinumdoman nga naglakaw ug nagsakay sa iyang motorsiklo ang biktima gikan sa Sangat, apan pag-abot sa Barangay Greenhills, gipakanaog kini sa motor ug pila ka gutlo ang nakalabay, gipusil kini sa makadaghang higayon.
Dali nga nisibat ang mga suspek sakay sa ilang mga motorsiklo.
Apan nakakuha og mga saksi ang kapulisan nga nakaila gyud sa mga naghimo sa krimen.
Padayon pa nga gipangita sa San Fernando Police Station ang tulo ka suspek nga pabilin pang gawasnon ug gituohang nakabiya na sa maong lungsod.
Bisan pa man niini, gipahibawo sa kapulisan nga giisip nang "solved" ang maong krimen tungod kay nailhan na ang tanang nalambigit ug giandam na ang ipasaka nga kaso batok kanila. / AYB
