Patay ang 22 anyos nga construction worker human gipusil sa alas 11:30 sa gabii, Lunes, Enero 6, 2025 sa Sityo Lower Calvary, Barangay Apas, Dakbayan sa Sugbo.
Ang biktima giila nga si Rico Camay Pepito, lumad nga taga Barangay Argawanon, Lungsod sa San Remegio apan kasamtangan nga nagpuyo sa Sityo Rotunda Barangay Banilad, Dakbayan sa Sugbo.
Sa imbestigasyon sa Mabolo Police Station nga samtang nagbaktas ang biktima sa maong lugar pauli sa balay sa iyang kapuyo, kalit lang naabot ang gunman nga nailhan lang sa pangalang Alfie nga taga Upper Laguerta, Sityo Tarcom, Barangay Lahug, Siyudad sa Sugbo.
Sa walay pagduhaduha, gipusil sa makadaghang higayon ang biktima sa luyong bahin sa ulo nga niresulta sa iyang kamatayon. Matod sa mga saksi sa dapit, dunay lain nga kauban si Alfie nga nagsilbing look out.
Matod ni Police Major Romeo Caacoy Jr., hepe sa Mabolo Police Station sigon sa asoy sa live-in sa biktima nga nalambigit siya sa ilegal nga drugas.
Aduna sab magsige og panawag ni Pepito apan dili niya kini tubagon nga maoy gisubay sa kapulisan sa Mabolo.
Sa nakuha usab nga kasayuran ni Caacoy nga nataktak sa trabaho kaniadto si Pepito tungod sa kalambigitan niini sa ilegal nga drugas.
Ang Mabolo Police Station milusad na sa ilang manhunt batok sa gunman. /