Ex-convict gikan nagpalit og burger gipusil-patay sa riding-in-tandem alas 3:10 sa kaadlawon, Sabado, Marso 22, 2025, sa Sitio Bajac, Barangay Poblacion, Lungsod sa Liloan.
Si Jomar Mantuhac Andrino, 31, adunay kapuyo, taga Purok Cogon, Barangay San Vicente, Lungsod sa Liloan ang namatay human gipusil tumong sa iyang agtang. Nasayran nga nabilanggo na kaniadto sa kasong illegal drugs si Andrino.
Sumapa pa ni Police Chief Master Sgt. Arne Goc-ong, imbestigador sa Liloan Police Station sa dihang nahinabi sa Superbalita Cebu nga ang biktima uban sa iyang higala namalit og burger niadtong higayona.
Human sa pagpamalit nagpaabot og kasakyan nga traysikol ang biktima sa iyang pagpauli, apan adunay niabot nga motorsiklo nga gisakyan sa duha ka mga lalaki ug ang angkas mitira ngadto ni Andrino, dayon sibat mamumuno.
Gituohan base sa pamahayag ni PCMS Goc-ong, nga drugas ang motibo sa krimen.
Giingong nakadispalko ang biktima, nga giingong wa makabayad sa utang sa illegal drugs, bisan nga gisigehan na og paningil sigun pa sa saysay sa iyang mga higala. Tungod kay wa makabayad nakadawat kini og hulga sa iyang kinabuhi.
"Nabasa nato sa iyang selpon sa chat gihulga kay wala makabayad, dako nga amount sa drugas ang wala mabayri," dugang ni Goc-ong.
Ang biktima nabilanggo na kini sa kaso sa drugas sa Barangay Basak, Mandaue City ug napriso sab sa Lungsod sa Liloan tungod sa drugas.
Atol niining pagsuwat padayon pa nga giila ang duha ka lalaki nga miluthang patay ni Andrino. / GPL / DVG