Usa ka 33- anyos nga utility worker ang gipasanginlan nga nilugos og 15 anyos nga dalaga nga silingan sa makadaghang higayon sa Dakbayan sa Carcar nga nasikop sa kapulisan niadtong Mayo 4, 2025.
Ang dinakpan nga nailhan lang sa alyas nga “Roger” nagtrabaho isip utility worker sa usa ka production company sulod sa tulo ka tuig, dunay duha ka anak apan dugay na nga buwag sa iyahang asawa.
Samtang ang biktima nga si alyas “Cherry” usa ka tinun-an sa Grade 7 .
Base sa imbestigasyon, nisumbong ang biktima sa iyang amahan nga kadaghan na siya gilugos sa suspek ug gibaharan nga patyon ang iyang pamilya kon mosumbong hinungdan nga nidangop sila sa kapulisan ug gisikop kini.
Nisaysay ang biktima ngadto sa kapulisan nga ni “chat” kaniya ang suspek nga paadtuon sa balay niini kay duna silay panag-esturyahan.
Sa ekslusibong pakighinabi sa suspek, hugot niyang gihimakak ang pasangil.
Niinsister ang suspek nga duna silay relasyon sa biktima ug usa na katuig nila kining gitago.
Giangkon sa suspek nga duna nay nahitabo nila sa biktima kaupat ka higayon ug wala kini pugsa.
Gitanggong na sa Carcar Police Station ang suspek ug mag-atubang kini og kasong statutory rape. / JDG