Gitumbok nga middleman sa pagpatay kang City Consultant Christopher Ceniza nitug-an nga usa ka babaye, nga na-verify sa mga awtoridad nga empleyado sa Lapu-Lapu City hall, maoy utok sa krimen.
Sa pakighinabi sa media sa Lunes, Enero 15, 2024, si Ted (dili tinuod nga ngalan), 49, mihimakak sa direktang pagkalambigit sa krimen apan niingon nga ang mastermind, nga iyang gitawag og “madam,’” igo lang nitahas kaniya sa pagpangita og gunman aron ipatuman ang krimen.
“Mangayo lang ko’g pasaylo sa mga pamilya sa biktima. Biktima ra usab ko. Gisugo rako sa mastermind, si Madam nako kay dako kog kabubut-on pagkangan nga silay nagpasulod nako’g trabaho. Wa ko gi torture sa mga polis, akong kabubut-on mo-surrender aron limpyo akong konsensya,” matod ni Ted.
Si Ted nisaad nga ipagawas ang kamatuoran ug ang tanang mga impormasyon bahin sa pagpatay kang Ceniza ngadto sa korte.
Si Police Lt. Col. Christian Torres, tigpamaba sa Lapu-Lapu City Police Office (LLCPO) ug hepe sa City Investigation and Detection Management Unit (CIDMU), nagkanayon nga ilang nasikop ang gunman ni Ceniza pipila ka oras human ni-surrender si Ted niadtong Enero 9.
Si Torres niingon nga mag-atubang siya og kasong illegal possession of firearms.
Sa samang adlaw, si Torres niingon nga ang drayber sa gunman nitahan usab kang Lapu-Lapu City Mayor Junard “Ahong” Chan ug gipaubos sa protective custody.
Matod niya nga ang suspek nadakpan na kaniadto sa buy bust tungod sa paggamit og ilegal nga drugas.
Si Torres niingon nga ang mga suspek nasikop sa manhunt sa kapulisan human sila mailhi pinaagi sa CCTV footage.
Sa inisyal nga imbestigasyon sa LCPO nasayran nga pusilon unta sa mga suspek ang katabang ni Ceniza aron mahatagan og pahimangno ang naulahi nga dili manghilabot sa mga operasyon sa merkado.
Apan giingnan sa biktima ang iyang katabang nga mopauli pipila ka oras sa wala pa ang nahitabo. Bisan pa, gipadayon sa mga suspek ang ilang plano ug gipusil hinuon si Ceniza, matod ni Torres.
Si Torres niingon nga ang mga suspek mitug-an nga gibayran og P25,000 ug giingnan nga patyon ang usa ka “vendor” sulod sa merkado apan sa ulahi nangayo og dugang P50,000 sa pagkahibalo nga ang ilang biktima usa ka high profile nga indibidwal.
Matod niya nga takdo ang crossmatching sa armas sa gunman sa mga basiyo sa pusil nga nakuha gikan sa crime scene. Narekober usab sa mga otoridad ang getaway vehicle sa mga suspek, bisan giputol-putol na kini.
KAWANI SA CITY
Matod ni Torres nga ilang gitutokan karon ang pagkolekta og dugang ebidensiya, lakip na ang pagkumbinser sa pipila ka mga testigo nga mopaambit sa ilang mga pamahayag aron pagpalig-on sa kaso ug pagdakop sa mastermind.
Positibo niyang giila ang mastermind nga empleyado sa dakbayan sa Lapu-Lapu ug lakip sa mga kauban sa trabaho ni Ceniza.
Si Torres niingon nga ang nag-unang suspek naa pa sa Siyudad, hinuon nag-assign na sila og team nga momonitor sa iyang mga lihok, kon magplano siya nga moikyas samtang naghulat sa iyang warrant of arrest.
Matod niya nga target sa LCPO nga pasakaan og kasong murder ang duha ka nag-unang suspek, ang mastermind ug ang gunman, karong semanaha.