Human nga miabli ang Land Transportation Franchise and Regulatory Board (LTFRB) og prankisa alang sa Transport Network Vehicle Service (TVNS), usa ka transportation company ang nipahimulos sa kahigayonan ug nibukas og ride-hailing service nga gikatakda nga moserbisyo sa mga Sugboanon.
Ang Unified Transport Operations League (Utol) usa ka bag-o nga ride hailing app ang nipahigayon og grand launching niadtong Domingo, swa Disyembre 8, 2024 sa Gaisano Grand Mall, Barangay Banilad, Siyudad sa Sugbo.
Ang Utol walo pa lang ka buwan gikan unang gibuksan didto sa National Capital Region (NCR) gisundan ngadto sa Iloilo City, Bacolod, Cebu ug gikatakda nga isunod ang pagtanyag sa maong serbisyo ngadto sa Tacloban, Davao ug Cagayan de Oro City.
Gipahibawo ni Rosalie Maningas, general manager sa Utol nga sa kasamtangan adunay 1,700 nga rehistrado nga drayber partner ang Utol didto sa NCR samtang sa Cebu adunay 88 ka mga aplikante.
Garbo nga gipahibawo sa chairman sa Utol, Roland Maningas nga usa sa mga benepisyo nga gitanyag sa ilang mga drayber mao ang Social Security System (SSS) subsidy ug accident insurance ug uban pang mga benepisyo.
Nakanayon sab si Atty. Orland Ocampo, vice president sa Utol nga four wheel vehicle una ang ilang itanyag nga serbisyo ngadto sa riding public sa resonable nga fare rate tungod kay regulated kini sa ahensiya sa transportasyon.
Itakda sab nga isunod sa paglusad ang motorsiklo human nga ila na nga mahan-ay ang tanang mga aplikante. / FVQ