UV mokombati na sa Cebu City Collegiate Invitational

Mga duwa karon:

6:00 pm- BC batok UV

8:00 pm- UE batok JRU

Mopakita na og aksyon ang University of the Visayas (UV) Green Lancers sa 2nd Cebu City Collegiate Invitational Basketball Tournament karong Biyernes sa gabii, Hul­yo 7, 2026, diin kontrahon nila ang Benedicto College (BC) Cheetahs sa premirong duwa sa Cebu City Sports Institute sa Sawang Calero, Dakbayan sa Sugbo.

Mao kini ang labing unang higayon nga mokombati sa torneyo ang Green Lancers, 17-time champion sa Cebu Schools Athletic Foundation Inc. (Cesafi).

Sa premirong edisyon sa torneyo sa niaging tuig, wala nakaapil ang Green Lancers gumikan kay nakaeskedyul na kining daan nga moduwa sa laing torneyo niadtong higayuna.

Ang partisipasyon sa Green Lancers nakadugang og lamas sa unom ka mga adlaw nga torneyo, nga gisalmutan og tulo ka teams sa Cebu ug duha ka teams sa Manila.

Sa main game, magsangka ang Manila teams nga mao ang Jose Rizal University (JRU) Heavy Bombers ug University of the East (UE) Red Warriors.

Ang Heavy Bombers mao ang representante sa NCAA samtang ang Red Warriors sa UAAP. / ESL