Uyoan naangol human gidunggab sa iyang pag-umangkon, alas 6:30 sa gabii, Dominggo, Disyembre 8, 2024, sa Sitio Sumimbang, Barangay Bitoon, Lungsod sa Daanbatayan.
Si Edwin Tabarno, 49, minyo Construction worker, taga Sitio Caamo-an, Brgy. Dalingding, Daanbantayan, nakaangkon og duha ka mga samad dinunggaban sa tiyan.
Nasikop sa kapulisan ang suspek nga pag-umangkon nga si Dindo Tabarno, 28, ulitawo, construction worker.
Si P/Sr. Master Sgt. Alfredo Mandal, imbestigador sa Daanbatayan Police Station, nibutyag sa Superbalita Cebu ang uyoan dunay personal nga panagbangi kabahin sa ilang trabaho sa kontraksiyon.
Ang duha nag-estorya unta sa ilang problema sa trabaho aron mahusay apan nisangko sa panaglalis.
Gihapak og bato sa uyoan ang iyang pag-umangkon hinungdan sa pagbalos sa naulahi nga nikuha og kutsilyo ug iyang gidunggab ang uyoan sa makaduha kahigayon.
Ang biktitma luwas sa makuyaw nga kahimtang human naoperahan sa Vicente Sotto Memorial Medical Center (VSMMC) sa Dakbayan sa Sugbo.
Ang suspek nga pag-umangkon kasamtangang gitanggong sa Daanbatayan Police Station samtang gihikay ang kasong frustrated murder./GPL