Uyoan giputla’g ulo

PATAY: Gisusi sa polis ang lawas sa uyoan nga giputla’g ulo sa iyang pag-umangkon ug gihiwa-hiwa gamit ang sundang tungod sa selos sa Sitio Malaumon, Brgy. Tinubdan, lungsod sa Daanbantayan, alas 8:00 sa buntag sa Lunes, Pebrero 5, 2024. / Gikan sa kapulisan sa Daanbantayan
PATAY: Gisusi sa polis ang lawas sa uyoan nga giputla’g ulo sa iyang pag-umangkon ug gihiwa-hiwa gamit ang sundang tungod sa selos sa Sitio Malaumon, Brgy. Tinubdan, lungsod sa Daanbantayan, alas 8:00 sa buntag sa Lunes, Pebrero 5, 2024. / Gikan sa kapulisan sa Daanbantayan

Uyoan giputla’g ulo ug gihiwa-hiwa pa ang lawas sa iyang pag-umangkon tu­ngod sa giingong selos sa ilang ‘panagribal sa gugma ni Gretchen Barreto’, alas 8:00 sa buntag sa Lunes, Pebrero 5, 2024 sa Sitio Malaumon, Barangay Tinubdan, lungsod sa Daanbantayan, amihanang Sugbo.

Ang biktima usa ka senior citizen, giila nga si Cristitulo Broñona Casinillio, mag-uuma, lumolupyo sa naasoy nga dapit.

Dihang nakaplagan sa mga silingan, gawas sa putol na ang ulo, gitunga ang lawas, gihiwa ang mga bitiis ug ubang bahin sa lawas.

Ang suspek mao si Jorge Camay Casinillio, kapin sa 50 anyos, ulitawo, kanhi taxi driver sa dakbayan sa Sugbo, nagpuyo sa nahisgutang lugar.

Dugang nasayran sa kapulisan nga nagumon ang suspek sa ginadiling drugas.

Si Police Senior Master Sgt. Alfredo Mandal, chief investigator sa Daanbantayan Police Station nga nahinabi sa Superbalita Cebu pinaagi sa telepuno, nagkanayon nga ang biktima naghapyod sa iyang manok nga igtatari sa gawas sa iyang balay.

Apan kalit nga giataki sa pag-umangkon ug gitigbas sa makadaghang higayon sa ulo, ug ubang parte sa lawas gamit ang sundang ug usa ka sanggot.

Ang naghawid sa mga parte sa lawas sa biktima panit na lang human sa paghiwa, lakip ang mga bitiis niini.

Dunay mga kabanay ug silingan nga nakakita sa krimen apan nangahadlok, wala sila makahimo sa pagbadlong sa suspek.

Matod ni Andal, selos ang motibo sa krimen base sa sulti sa suspek nga gituohan nga wa sa maayo nga pangisip.

“Nag-hallucinate ni siya. Karibal daw niya iyang uyoan sa gugma kang Gretchen Barreto (artista). Sa kalagot iyang gipatay, giputla'g ulo,” dugang ni Mandal subay sa ilang pag-imbestigar sa suspek.

Gibutyag ni Mandal nga ang suspek nag-drive og taxi kaniadto ug nagpuyo sa Brgy. Kasambagan, dakbayan sa Sugbo.

Apan niuli kini sa Daanbantayan human grabeng nagumon sa gidiling drugas.

Nagtuo ang mga kabanay nga nibalik sa pagsuyop og shabu ang suspek.

Naabtan pa sa crime scene sa kapulisan ang suspek ug ilang gi-negotiate ug nitahan kini kanila nga malinawon, gilabay ang iyang sundang ug sanggot.

Sumala sa kapulisan, ang suspek pasakaan og kasong murder ug ang korte na ang modeterminar kon naa ba sa maayong pangisip ang suspek sa paghimo sa krimen.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph