Namatay dihadiha ang usa ka uyoan human gipusil sa iyang pag-umangkon nga nahutdan sa pailob kay matod pa kanunay niya kining giingnan nga ‘way grado.’
Ang maong insidente nahitabo sa alas 6 sa gabii sa Dominggo, Marso 16, 2025, sa Sitio Tipolo, Barangay Mabasa, bukirang bahin sa Lungsod sa Argao.
Ang biktima giila nga si Dindo Datuin Solis, 52 anyos, minyo, usa ka mag-uuma, samtang ang suspek mao si Sany Solis, 23 anyos, ulitawo.
Sa pag-follow-up sa Superbalita Cebu, nasuta sa pasiunang imbestigasyon sa kapulisan sa maong lungsod nga ang biktima ug ang suspek may daan na nga panagbingkil.
Matod sa suspek nga kanunay siyang ingnon sa biktima nga way grado, way iniskuylahan ug kon magkalalis sila, hagiton siya sa iyang uyoan og pinusilay.
Atol sa maong hitabo, ang biktima nagmaneho sa iyang motorsiko uban sa iyang 12 anyos nga anak nga lalaki nga angkas.
Padulong na sila mopauli gikan sa pikas sitio, apan pag-abot nila sa awaaw nga bahin sa maong dapit, gipahunong sila sa suspek dungan sa pag-ingon “gahi ka tiyo,” ug dayong pusil sa biktima tumong sa dughan ug sa ulo niini.
Ang anak sa biktima wala ra unsaa ug maoy lig-ong saksi ug nakaila sa suspek kinsa nadakpan atol sa gipahigayong hot pursuit sa kapulisan sa Argao.
Narekober sa kapulisan ang 38 nga revolver ug duha ka kabhang sa bala niini gikan sa pag-umangkon.
Kasong homicide ang atubangon sa suspek. / DVG