Kulbahinam nga hinampakay ang gilaumang masaksihan sa pagpahigayon sa V-League Visayas tournament nga sugdan karong Dominggo, Hulyo 6, 2025, sa University of San Jose Recoletos (USJ-R) Basak Coliseum sa Dakbayan sa Sugbo.
Ang kompetisyon opisyal nga gilusad niadtong Sabado, Hunyo 28, sa Quest Hotel, nga gitambungan mismo ni Premier Volleyball League (PVL) President Ricky Palou.
Unom ka teams gikan sa nagkadaiyang mga tunghaan ang magkombati sa torneyo.
Kini mao ang University of San Carlos (USC), University of Cebu (UC), Cebu Institute of Technology University (CITU), University of the Philippines (UP ), University of Southern Philippines Foundation (USPF), ug USJ-R.
Atol sa paglusad sa torneyo, ang tanang partisipanteng teams ningpadayag sa ilang grabe nga kahinam ug nisaad nga buhatan nila ang tanan alang sa dakong garbo ug dungog.
Nagkanayon si Palou nga magpadayon kining maong torneyo sa tinguha nga makadiskubre pa og dugang dekalidad nga mga magduduwa gikan sa rehiyon.
Gipasabot ni Palou nga taudtaod na kini nilang giplano apan karon lang nahitabo ug gipasalamatan niya ang tournament commissioner nga si Ken Ucang sa paningkamot niini aron mahan-ay ang tanan kabahin sa Visayas leg.
Nidugang si Palou nga ang mahimong kampyon sa Visayas leg ilang dad-on sa Manila aron iparang og dekalidad nga mga puwersa.
Sa premirong adlaw sa torneyo, adunay ipahigayon nga exhibition games diin makigbatok ang Cignal HD Spikers men’s ug women’s teams sa mga kampiyon sa Cebu Schools Athletic Foundation Inc. (Cesafi).
Ang Cesafi men’s champions mao ang UC Webmasters samtang sa women’s mao ang USC Lady Warriors. / ESL