Hugot nga siguridad ang gipatuman sa kapulisan sa dakbayan sa Sugbo atol sa pagselebrar sa Valentine’s Day nga nadungan usab sa relehiyosong kalihukan sa simbahang Katoliko nga mao ang Ash Wednesday.
Apan bisan pa niini, dunay linahi nga kalihukan ang Cebu City Police Office aron pagpakita sa ilang dakong gugma sa publiko.
Sila ningduyog sa pagsaulog sa Valentine’s Day pinaagi sa pagpanghatag og buwak.
Nangunay si Police Colonel Ireneo Dalogdog, hepe sa Cebu City Police Office (CCPO) sa pagpanghatag og pula nga roses niadtong naa sa sulod sa simbahan, lakip na sa publikong lugar.
Matod ni Dalogdog nga ning pagselebrar sa Valentine’s Day ug pagsugod na sa Kwarisma magpadayon sila sa pagpatuman sa kahusay ug kalinaw.
Duna silay mga polis nga gitahasan nga mobantay sa mga dapit nga suroyanan sa mga managhigugmaay.
Ang Waterfront police station sa pagpangulo ni Police Major Efren Diaz nanghatag usab og buwak sa mga turista nga ningbisita sa Plaza Independencia ug Fort San Pedro.
Samtang pinasahi usab ang gihimo sa Highway Patrol Group 7 (HPG 7) sa pagpangulo ni Police Lieutenant Colonel Wilbert Parilla gumikan kay nag muntar sila’g checkpoint sa ML. Quezon Ave. sa Barangay Pajo, Dakbayan sa Lapu-Lapu.
Ang ilang gipara ang mga motorista nga inay isyuhan og violation tickets,nanghatag hinuon sila og regalo nga kabahin sa pagsaulog sa Valentine’s Day.