Vallacar bus mobiyahe sa bukiran sa Argao

Ang pagtugot sa mga bus gikan sa dakbayan sa Sugbo nga moagi sa kabukiran sa Argao, nakapabalaka sa mga drayber sa habal-habal apan nakalipay sa mga residente.

Gipahibalo sa local government unit (LGU) sa Argao nga subay sa public consultation sa Barangay Taloot niadtong Abril 17, kadaghanan sa mga residente ug mga konsehal sa lungsod aprubado sa bag-ong rota nga gi-apply sa Vallacar Transit Inc., nga nag-operate sa Ceres Bus Liner.

Ang aplikasyon gisumiter sa Land Transportation Franchising and Regulatory Board (LTFRB) nga mao ang Cebu City ngadto sa Anajao via Taloot route ug vice versa.

Ang bayranan mobalor og P154 alang sa biyahe gikan sa Cebu City paingon sa Barangay Anajao ug vice versa.

Ang biyahe paingon sa Barangay Taloot gikan sa Anajao, ug vice versa, nagkantidad lang og P44.

Upat ka mga bus ang mobiyahe sa bag-ong rota.

Ang 12 ka barangay nga sakop sa bag-ong rota mao ang Anajao, Apo, Tulang, Mompeller, Lengigon, Colawin, Gutlang, Langub, Mandilikit, Sumaguan, Capio-ug Taloot.

Si Roldan Calba, presidente sa asosasyon sa mga habal-habal driver sa maong dapit, gikutlo sa LGU nga nitug-an nga ang mga drayber sa habalhabal unang ningsupak sa maong ideya, apan nasuta nila nga wala silay mahimo hinungdan nga nisugot na lang sila.

“Una, supak unta mi pero niadtong bulan sa Pebrero, kadaghanan namong mga habal-habal driver, ni-surrender na lang, mao ni karon mo-uyon na lang mi. Hinaot lang pud nga di mi talikdan sa Konseho,” matod ni Calba.

Iyang gihangyo ang konseho sa lungsod nga dili sila motalikod kanila.

Agi’g tubag, gihangyo sa Konseho ang VTI nga unahon ang mga drayber sa habal-habal kon magsugod na kini sa pag-hire og mga trabahante alang sa bag-ong rota.

Si Marlo Bulandres, VTI operations manager, niingon nga ang VTI magkinahanglan og 50 ka mga drayber, konduktor ug mekaniko, kinsa bayran sa kompaniya og P468 matag adlaw ug dugang allowances.

Ang LGU niingon nga ang mga biyahe mahimo’ng magsugod sa umaabot nga mga semana.

Sa way pagtino kon nagsugod na ba ang mga biyahe, ang LGU nipahibalo sa Miyerkules, Abril 24, sa mosunod isip inisyal nga eskedyul sa biyahe sa Anajao paingon sa Cebu City agi sa Taloot: Anajao paingon sa Cebu City, alas 4 sa buntag, alas 5 sa buntag, alas 11 sa buntag ug ala 1 sa hapon; Cebu City paingon sa Anajao, alas 5 sa buntag, alas 7 sa buntag, alas 4 sa hapon ug alas 6 sa gabii.

Gipasidan-an hinuon niini nga posibleng mausab ang schedule depende sa hangyo sa mga sumasakay. / CTL