Niadtong 2010-2012, ako ug ang akong pamilya grabe kaayo og involvement sa biking community. Night rides amoang giapilan. Sagad ang akong anak nga babaye, among eldest ug akong asawa akong kauban. Duna pa gani night rides nga naa ming tanan nangapil. Imagine manguli mi sa among balay kaadlawon na. Naa pa gani usa ka higayon nga naabtan mi og uwan.
Layo baya ning Bacayan sa city center pero giagwanta namo ang kalay-on kay grabe ang among kalingaw magsikad sa kadalanan niadtong panahuna. Di pa sab kaayo grabe ka daghan ang mga sakyanan ug motorsiklo niadtong panahuna.
Dunay mga higayon nga mangadto mi sa IT Park aron mangaon. Magbiseklita lang gihapon mi. Nalingaw kaayo ang akong mga anak ug asawa niadtong mga higayuna. Way ikabugti ang kalipay magsikad nga halos tanang mga sakop sa pamilya naa.
Kon kaniadto maayo pa kaayo isikad sa kadalanan kauban ang pamilya, karong panahuna medyo lahi na. Twice na ang kadaghanon sa mga sakyanan unya ang mga motorsiklo pil-on nag kaupat. Daghan na kaayo ang reckless nga drivers nga usahay makapangutana ka kon duna ba silay suicidal tendency kay di kahibawo mopahinay sa pagpadagan.
Ang luwas na lang nga pagsikad rong panahuna kanang sayo kaayo sa buntag ug lawom nang gabii. Kay grabe kadaghan na sa mga sakyanan. Bisan gud ang mingaw kaniadto nga lugar daghan na kaayo og mga sakyanan nga magdagan.
BONDING
Nindot unta kaayo nga paagi sa bonding ang biseklita, apan makapakitbi sa atay ang kakulba sa pagsubay sa kadalanan. Itandi kaniadto ug karon, daghan ang makita nga magsikad sa dalan, nagrisgo sa kaugalingon tungod sa di maayong kahimtang sa trapiko.
Kana lang mag-drive ko, mag-amping ko sa pagmaneho kay naay daghang maglakaw sa dalan nga wa kaila og kuyaw. Naa guy time nga nakahitan og gamay ang pedestrian tungod sa kadaghan sa naglakaw unya way nagpadaplin bisan gaaginod nang trapiko.
Kon maghandom ko sa kaniadto, mingawon ko nga maghuna-huna sa among lingaw sa simple kaayong mga bonding moment sakay sa biseklita. Kanang bonding namo ni Chelo nga kami rang duha magsuroysuroy sa pipila ka bungtod nga iyang maagwanta og saka.
Bonding moment sab namo sa akong mga anak nga magbiseklita tungas sa Busay o Guba. Karon memories na lang kay bisan sila mangahadlok na sa pagsikad tungod sa kadaghan sa mga sakyanan. Ang mga mingaw kaniadto nga kadalanan kay ang suok gisubayan na sa mga motorsiklo.
Kanindot unta kon nadayon pa ang among gi-fight nga exclusive bike lane kay kadaghan sa mga tawo nga ganahan mosikad.
NIGHT RIDES
Ang proof sa kadaghan ganahan manikad sa kadalanan mao ang among night ride kaniadto sa Tindak Bisdak Cebu Folding Bike Society. Diha pay mga higayon nga moabot mi og 200 kapin. But amo ning gihunong tungod sa nagkagrabeng kahimtang sa trapiko.
Bisan gani ang Earth Hour Night Ride nga kanunay nga giorganisar sa Habagat wa na ko kamatngon nga gipadayon. Hayan gawas nga lisod na kay wa na ang sagad namong mga kauban nga mag-marshal kaniadto, makamugna sab gyud ni og kaguliyang rong panahona tungod sa naghuot na daang mga sakyanan.
Unya ang sagad agian sa rota mao ang major nga kadalanan sa siyudad aron mag-emphasize sa kampanya sa pagdaginot sa kuryente ug paggamit sa renewable energy.
Ang among umbrella organization nga Tindak Sugbo wa na gani kaayo mag-involved sa rides kay gawas nga nahimangod mi sa resulta sa implementation, gipasagdan ra sab ang Cebu City Government sa mga barangay kapitan.
Ang implementasyon sa bike lanes di gyud molampos kon way partisipasyon sa mga barangay nga giagian niini. Di intawon na maato sa Sugbo Bike Lanes patrollers nga giorganisar sa akong higala nga si Atty. Gerry Carillo. Maluoy lang ko magtan-aw sa patrollers nga klaro sab nga magpangikog magpatuman kay daghan bayang isog.
Hinaot pa nga in the near future madayon na ang protected bike lanes. Kon moabot ni, manggawas gyud nang mga biseklita nga dugay nang gipanaguan sa mga suok sa kabalayan.