Vallena: Biseklita: Sulbad sa daghang mga problema

Pedal
PedalVallena

Niadtong Biyernes sa dayon nang gabii, nidalikyat ko sa pagbisita sa Bulacao barangay hall kay dunay importanteng gihimo isip kabahin sa trabaho. Dul-an sa usa ka oras ang akong biyahe nga makuha ra unta og 10-15 minutos. Unsay hinungdan? Kahuot sa trapiko.

Apan duna lang koy obserbasyon. Mas grabe ang trapiko sa Cebu City north district itandi sa south district. Ang trapiko, labina sa rush hours, usahay magsukad sa Ayala hangtod na sa Talamban. Naa pay higayon nga gikan pa sa Bry. Pit-os paingon sa Ayala.

Bisan gani kagahapon sa Sabado, grabe ang kahimtang sa trapiko gikan sa Nasipit, Talamban hangtod sa may eskina padulong sa IT Park. Masabot ang sitwasyon kay nagkadaghan ang mga sakyanan. Unya ang mga eskina sa mga karsada nagsilbe nga chokepoint kay anha mag-abot ang mga sakyanan. Pila kaha ka mga eskina ang labangon sa atoang mga karsada?

FOLDING BIKE

Samtang nagtadlas ko sakay sa akong motorsiklo (scooter ang mas sakto nga termino), nahinumdom ko sa akong panahon nga naggamit ko og folding bike sa akong bike-to-work kaniadto. Mas lami kaayo gamiton ang 16-inch folding bike. Gamay tuod ang mga ligid apan 48 man sab ang ngipon sa iyang plaka.

Ang nakaanindot pa kay tungod sa iyang geometry, sayon kaayo isuotsuot sa trapiko. Di sama sa motorsiklo, o bisan gani sa mountain bike nga kuwayan kang masabod sa sakyanan ug makabayad ka na hinuon.

Nasulayan na nako kaniadto ang kamaayo sa 16-inch wheel folding bike. Namauli mi sa akong amigo nga nagsakay sa iyang mountain bike while ako sa gamay nga folding bike. Nagkabuwag mi sa Pope John Paul II Ave. tungod sa trapiko.

Pag-abot nako sa balay, ni-text siya nga naabot na sab siya. Ang amoa Bacayan while siya nagpuyo sa Nasipit, Talamban. Diha nimo makita ang kaanindot sa gamay nga foldinge bike nga isuot sa naghuot nga trapiko.

So, nganong magmotorsiklo pa man kon ang imong tuyo naa lang sa 6-8 ka kilometro gikan sa imong gipuy-an, sama sa trabaho? Di ba mas epektibo pa ni nga transportasyon kay sa sakyanan nga dunay makina?

BIKE-TO-WORK DAY

Niadtong uwahi’ng semana sa Nobiyembre gideklarar ang National Bike-to-Work Day matag katapusang Lunes sa mao nga buwan. Tumong ni Presidente Ferdinand Marcos Jr. nga anam nga mahibalik ang biseklita sa atoang mga karsada isip usa sa modes of transportation.

Sakto kaayo ang Presidente kay sa kahuot sa trapiko karon ug sa kausaban sa panahon tungod sa global warming, dako kaayo og ikatabang ang biseklita sa mao nga problema. Mopaminos sa carbon footprint sa mga karsada ug mopahimsog sa nagbiseklita.

Kadaghan sa mga problema nga masulbad sa yano nga biseklita, apan gamay ra ang nakakita niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph